Gobierno kier cambia formula di calcula prijs di gasoline na Aruba

ORANJESTAD – Un dia prome cu prijs di gasoline bolbe subi na Aruba, manera cu a keda anuncia mas tempran diamars, gobierno a splica kico e situacion ta. Mas importante ki influencia gobierno tin riba e aumento di gasoline. Tin e pensamento cu ta gobierno ta esun cu ta blo subi prijs di gasoline y ta haci esaki segun conveniencia. Segun un comunicado difundi pa gobierno, nan ta sigura cu no ta nan ta culpabel pa e subida di prijs di crudo, y tampoco ningun otro gobierno. A mustra cu e prijs di gasoline ta core paralelo cu prijs di crudo. Pues si uno subi, e otro tambe ta subi. Loke si gobierno por haci, ta traha riba e calculacion di prijs di gasoline. Y esey nan ta purbando y ta haciendo tramitenan pa cambia e forma di calcula prijs di gasolin na Aruba.

MALA SUERTE

Segun gobierno actual, nan ta bisa cu ‘gobierno di Gabinete Wever a toca e mala suerte cu e prijs di crudo ta subiendo mundialmente den su prome lunanan di gobernacion’. Ademas e ta sigura cu a esaki ta loke a pone cu prijs di gasoline a subi.

PLATTS ANALYTICS

Segun e comunicado di gobierno, un representante di Platts Analytics ta indica cu e mercado di crudo ta pasando den e “cambio di mas grandi den historia di mercado petrolero” cu lo conduci na pusha prijsnan halto. E ta considera tambe cu esaki ta bay ta e cambio mas perhudicial pa e industria di refinacion di historia, esaki segun e pagina online oilprice.com.

INFLUENCIA

Riba e pregunta si Gobierno di Aruba por influencia riba e subida of bahada di prijs di gasoline, e contesta ta keda na principio no, pasobra e prijs di crudo mundialmente ta fiho ademas di e sistema cu e prijs ta wordo calcula aki pa hopi aña cu no a wordo cambia.