Grupo di docente di EPI malcontento cu minister

ORANJESTAD – Un grupo di 19 docente di EPI ta sumamente desapunta cu e entrevista ultimo di minister di enseñansa drs. Armando Lampe, via medionan social, caminda di un forma repugnante ta trata na crea un impresion como si fuera docentenan di EPI, unidad C&T, no ta trahando na servicio di nan alumnonan. Asina nan ta bisa den un comunicado, hunto cu e lista di 19 firmante cu ta valida e carta cu nan a publica.

SOLUCION TEMPORAL

Segun e docentenan ,en conhunto cu departamento di scolnan publico (DPS), directiva di EPI y managernan di unidad C&T, manera hende grandi, nan a caba di yega na un solucion temporal pa un problema cu ta andando. Nan no a spera cu despues di e acuerdo aki ainda e minister en cuestion, cu niun momento so tabata presente durante reunion di e partidonan ariba menciona, dos dia despues (diaranson, 6 juni 2018), manera mucha chikito, ta core yama prensa pa duna un declaracion sin escrupulo di marca mayor, usando “leerling staat centraal” como arma pa na su banda haya sympatia di pueblo y di otro banda trata na mancha integridad di docentenan.

IMPRESION FALSO

Segun e docentenenan, dicho solucion ta desmenti impresionnan falso cu e minister kier trata na crea di e docentenan. Den e caso specifico aki docentenan por prueba cu nan kier y ta traha pa alumnonan dor cu ta hustamente nan a pone enfasis y ta luchando duro pa soluciona un problematica structural cu ta andando ya pa mas di 20 aña consecutivo (entre otro: ‘tien nakijkdagen’). Durante tur e añanan ey docentenan a sa di coopera pa asina e scol su cara no tin cu keda na berguenza. Di un dede, awor kier tuma dies. Pa docentenan ta inaceptable cu paso e organo mas halto di educacion, durante tur e añanan menciona, no tabata capaz di ahusta y mehora dicho structura, awo ta trata na impone trabaonan riba nan.

Den e dicho entrevista e minister no ta para tras di loke e mes a pone den un carta dirigi na e docentenan. Nan ta mira con facilmente e minister aki ta cambia di posicion y palabracionnan loke ta conduci na confusion- y frustracionnan. E minister cu ta usa “de leerling staat centraal” cu tanto formalidad no ta realiza cu di e forma aki ta e mes ta bezig ta boycott nos futuro ciudadanonan? Ta claramente bisto cu e minister en bez di asumi su responsabilidad, di un forma baho ta trata na schuif esaki un banda puntando awo, di un dia pa otro, dede riba docentenan.

INDEPENDISACION DPS

Otro ehempel di e maneho controversial di e minister actual ta durante di su rondanan encuanto independisacion di DPS caminda e no tawata riba un liña den su presentacionnan. Consecuentemente su empeño pa sí independiza EPI a crea un esfera amargo bao di docentenan di unidad C&T. Pa completa obra, cu su expresionnan insinuativo den e entrevista en cuestion, e minister no ta yuda drecha e ambiente.

RESPET

Docentenan ta termina declarando cu nan no kier tin ni arte, ni parte den semehante mal maneho of politikeria di fanfaria y comokiera ta exigi na prome luga respet y pa e ministerio concerni haci su trabao manera debe ser y soluciona e problematica di e structura ‘once and for all’.