Gerente di compania di seguro a recobra su libertad temporal

ORANJESTAD – E office manager di un compania di seguro na Aruba, e sospechoso G.L.M.H. cu tabata deteni sospecha pa robo, a recobra su libertad temporal. Segun vocero di ministerio publico Ann Angela, ta warda aworaki riba e ‘eind procesverbaal di polis y cu abase di esaki, fiscal ta tuma decision con ta sigui cu e sospechoso. Sea si ta sigui persigui e persona (y na ki manera) of si no ta persiguie p.e. pa falta di prueba.”Tur hende ta inocente te ora cu nan wordo declara culpabel pa un huez” Angela a recorda tur hende.

E noticia di e detencion di e persona aki, a hala atencion debi na su funcion y e compania envolvi. Despues di su detencion inicial, esaki a keda prolonga pa 8 dia. E persona aki lo a wordo sospecha di robo na un cas, aunke su abogado no ta compronde e operacion aki. Unabes cu e persona aki a compronde cu e tabata wordo busca, e la dicidi di raporta na warda di polis, unda cu e la wordo deteni.

Informacion cu NoticiaCla.com a compila, ta cu e persona aki lo a wordo pidi durante bishita na e cas, pa atende un raportahe di seguro, pa yuda pone un porta. E persona lo a cumpli cu e peticion, pa cual e imprenta di su dedenan a keda marca riba e porta. Dos dia despues, polis a investiga e caso pa cual a bin haya e ‘fingerprints’ aki. E caso mientrastanto ta keda bou di investigacion.