Desde awor por cumpra wega di lotto online tambe!

ORANJESTAD – Lotto a anuncia diamars cu despues di 19 aña di existencia, cu ta bay cuminsa bende lotto ‘online’. E compania a dicidi pa tuma e paso aki pa gara e mercado grandi di persona cu ta haci uzo di tecnologia moderno. Por cumpra lotto on line awor usando bo smartphone, tablet of computer.

CON PA CUMPRA ONLINE

Pa por haci esaki, mester bay riba .www.lottoaruba.com, click riba e tab Play Now y traha un cuenta. Despues di aprobacion, e hungado mester pasa cerca un rebendedor pa pone fondo riba su cuenta. Esaki ta e asina yama Top Up. Tene cuenta cu pa traha un account, tin algun rekisito cu mester cumpli cune pa ricibi aprobacion. Entre otro cu e hungado mester tin 18 aña of mas, y tambe mester upload un ID valido. Asina cu bo cuenta wordo aproba, e sistema automaticamente ta kita bo ID for di e sistema. Si no ta desea di upload ID, por pasa tambe na oficina principal di Lotto na Paardenbaaistraat 10, cu bo ID. Despues di aprobacion, e hungador por cuminsa agrega fondo na su cuenta. Tin dos manera pa Top Up bo cuenta. 1. Pidi e rebendedor pa manda e fondo directo na bo cuenta. Den e caso aki bo ta duna e rebendedor bo codigo di hungado. Of e rebendedor ta print un ticket cu un number serial y abo mes ta Top Up bo cuenta. E sumanan cu bo por kies pa Top Up, ta Afl 5, 10, 20, 25, 50, 100, 250, 500, y 1000.

Tur e weganan di Lotto ta na benta online.