Gobierno kier ubica personal y trucknan di Serlimar na Barcadera despues

ORANJESTAD – Mientras cu gobierno a a contract di huur pa e ex edificio di DTI na Pos Chikito pa ubica oficinanan di Serlimar, e mandatario encarga Otmar Oduber a mustra cu esaki ta pa un periodo temporal di 2 aña mas of menos. Segun Oduber, e intencion ta pa busca un espacio na Barcadera unda cu por ubica tanto personal como truck hunto. Esaki pasobra mientras cu ta mudando e oficinanan, no ta logico pa laga e trucknan si na San Nicolas den un sitio habita. Mes momento a sigura cu e accion di firma den fin di siman di un grupo di persona pa ‘para mudamento di dump’ pa Pos Chikito, no ta corecto pasobra ningun momento gobierno a bisa cu lo ta mudando e dump pa e sitio ey.

MUDANSA DI PERSONAL

Recientemente gobierno a anuncia mudanza di personal di Serlimar for di San Nicolas pa Pos Chikito, den e ex edificio di DTI. Aki lo bin cu bakinan special di reciclahe, ademas di e personal compoleto di oficina. E mudanza aki a crea un ola di reaccion, unda cu ta cuestiona esaki mirando cu e trucknan si ta kedando San Nicolas. Pero dialuna mainta, e mandatario responsabel pa e departamento, a informa cu e intencion ta pa muda e trucknan tambe pero na Barcadera, y den un edificio unda cu por ubica e personal tambe. Pues e mudanza di e personal di edificio di Serlimar, lo ta pa un periodo temporal di posiblemente 2 aña, te ora cu haya e edificio ‘compatible’ pa e meta di tanto personal como ekipo.