Cambio den top di Arubus na caminda pero no tin persona ainda

ORANJESTAD – Minister di transporte Chris Romero a confirma na NoticiaCla dialuna mainta cu tin cambio na caminda den top di Arubus, y cu e ta un decision mutuo, esta di ambos banda. Di otro banda e mandatario a desmenti e noticia di un otro portal di noticia (24ora.com) cu ya tin un persona caba apunta pa reemplaza e actual director Teo Croes. “Esey no ta corecto” Romero a sigui bisa. A mustra cu ta papiando cu otro y cu ora cu ta asina leu, lo informa tur cos debidamente.

NOTICIA INCORECTO

Recientemente tabatin un noticia den e otro portal cu gobierno kier kita e director actual di e compania di transporte, y reemplaze cu un persona liga na e mandatario di transporte. E mandatario a admiti cu e conoce e persona cu ta wordo menciona y cu e ta cualifica pa e funcion, pero cu e noticia cu e persona menciona, ta bay haya e funcion, no ta corecto.

CAMBIO DEN TOP

Mes momento e mandatario a mustra cu pa tin cambio den maneho di Arubus, mester tin cambio den top y no por keda cu un mesun top pa hopi tempo. Y den cuadro di esaki, ta papiando cu otro y cu e cambio lo bira uno unda cu ambos partido ta di acuerdo cu e cambio y cu ta den deliberacion cu otro con pa yega na otro riba e tema aki.