Studiantenan Rietveld Academie malcontento cu Minister Lampe

ORANJESTAD – Un grupo di studiantenan cu a atende e academia di arte, Rietveld Academy ta protestando actuacion di actual minister di enseñansa Rudy Lampe, cu lo kier saca nan for di e edificio. Den un carta dirigi entre otro na prome minister di Aruba Evelyn Wever Croes, e studiantenan ta mustra nan malcontento pa cu e situacion aki. “Minister Rudy Lampe kier saca nos for di e edificio, y sin un garantia cu e scol por contina cu e comienso di e Bachelors Degree of Fine Arts and Design”. Inoficialmente, NoticiaCla a compronde cu e mandatario a para e proyecto debi cu e ta costando un dineral, acomodando solamente un grupito chikito. Cifra inoficial ta papia di miyones cu segun e mandatario, no ta hustifica e operacion aki. 

E CARTA

E carta, firma pa un cantidad di entre 8 pa 10 studiante, ta bisa cu e director di e scol no kier bisa mucho di e situacion, y no kier pa e studiantenan haci nada ainda, pasobra e kier ‘fix’ e asunto prome cu minister Lampe. E studiantenan ta sostene nan director y kier ayudo pa e director por logra mantene e scol habri. A splica cu for di tempo cu e scol a habri na Aruba, varios ya caba a sigui nan estudio avansa na Hulanda, Merca y Canada.

GOBIERNO

For di gobierno, e portal aki a compronde cu premier Wever a ricibi e carta enberdad, pero no ta conoci kico su reaccion ta ainda. E portal aki a compronde for di e minister di enseñansa, cu e problema ta e gastonan halto cu tin pa opera e scol aki y cu e no ta hustifica. Pero oficialmente a keda di bin bek cu un reaccion oficial riba e tema. For di october 2011 e academia a cuminsa ofrece cursonan preparatorio, pa despues sigui cu esaki mas avansa den exterior. Lesa e carta AKI.