Paro proyecto Urirama lo no nifica daño financiero pa gobierno

ORANJESTAD – E hecho cu gobierno a para e proyecto di parke di molina na Urirama, no mester tin implicacion financiero pa pais Aruba den forma di un daño y perhuicio. Asina minister di energia Evelyn Wever Croes a informa NoticiaCla e siman aki. E director di e compania cu tabata encarga pa traha e parke, Henk Hutting di Windpark Urirama NV, a bisa NoticiaCla e siman aki cu oficialmente e no a haya ningun notificacion di gobierno pues no por a duna comentario. Wever ta disputa esey y a bisa cu ‘e notificacion a bay via abogado segun ami a compronde di minister di husticia” Wever a sigura e portal aki. Tabata un siman pasa cu gobierno a informa oficialmente cu a ‘para e proyecto aki’.

DAÑO Y PERHUICIO

Segun Wever, ora cu bo tin un contracto cu un hende pa desaroya un edificio p.e. y na mitar caminda gobierno kibra e contract, bo por tin un riesgo di ta responsabel pa gastonan. Especialmente si ya caba nan a traha mitar edificio. “Eseynan ta consecuencia financiero realistico” Wever a bisa e portal aki. Pero den e caso aki, Wever a sigura e portal aki cu no tin un contracto pa traha molina. “Loke nan tabatin contracto cu WEB pa tuma energia si nan logra traha energia” Wever a sigui bisa. Pero si nan no traha energia, WEB no ta mara na dje” Wever a sigui bisa. “Pero cu gobierno di Aruba mes te cu e dia di awe, mi no a mira nada firma cu e compania aki ” Wever.

IMPRESION

Loke e compania por bisa, ta cu a duna e compania e impresion cu nan por a cuminsa, y a haci cierto gasto.”Wel mucho gasto nan no a haci pasobra no tin ningun molina ainda. Y mi no ta kere cu nan ta bay ta exitoso den esey” Wever a sigui bisa. Segun e mandatario, e compania tabata sa ‘from day one’, cu e comunidad no tabata di acuerdo cu esaki y tabatin casonan den corte. “Pues nunca bo por bisa cu mi a confia cu mi ta bay cuminsa si tin caso den corte” Wever a sigui bisa.