Ruiz: Ultimo carta di CAFT no ta menaza pa aanwijzing pa Aruba

ORANJESTAD – Gobierno no ta considera e ultimo carta di e colegio di supervision CAFT como un menaza pa un ‘instruccion’. E mandatario encarga, Xiomara Ruiz Maduro, a sigura NoticiaCla diabierna merdia cu e lo contesta e carta di CAFT den e tempo stipula (di 7 dia) y wak con e colegio aki lo haci e ora. Si despues di e biaha aki ainda e colegio no ta convenci cu gobierno ta haciendo tur cos posibel pa remedia e situacion, e ora ta keda na e colegio pa informa Rijksministerraad, cu na final lo dicidi ki paso ta tuma cu Aruba. E mandatario no ta kere cu lo yega asina leu pa duna Aruba un ‘instruccion’ (aanwijzing).

E CARTA

E mandatario a splica e portal aki cu e la papia cu e presidente di CAFT, Raymond Gradus e siman aki pues e carta di diahuebs no tabata un sorpresa. Y e tin tur confianza cu gobierno lo sa di informa e colegio satisfactoriamente. Ruiz ta contento cu di e 4 puntonan cu tabata di preocupacion, CAFT a mira aden cu 2 por lo menos Aruba a cumpli cune, y awor ta keda dos mas pa convence e colegio cu aki tambe nan ta trahando ariba.

RDA

Un di e puntonan cu CAFT ta cuestiona gobierno den e ultimo carta, ta e pago pendiente di Refineria di Aruba, cu ta e suma di 17.5 miyon florin. Aunke cu gobierno a sigura CAFT cu nan a haya e placa deposita y como tal por pone riba e presupuesto, CAFT a sigui insisti cu nan no tin confianza di esaki. Como tal Ruiz awor lo manda comprobante, un comfort, pa asina keda confirma cu esaki enberdad ta e hecho.

PERSONAL

Pa loke ta personal, aki tambe CAFT tin duda cu gobierno ta haciendo loke e mester a haci. Aki tambe Ruiz a sigura e portal aki cu gobierno ta haciendo tur loke mester haci. De hecho den conseho di minister diabierna a trata e carta y a tuma cierto decisionnan riba e parti aki cu lo sigur convence CAFT cu nan ta cumpliendo cu e punto aki. CAFT a reclama cu mientras gobierno ta papia di un reduccion di 3 miyon florin pa aña den e gastonan di personal, nan ta aumenta esaki cu 9 miyon pa e plan social di crisis siendo cu e pagonan ey no tin nada di haber cu crisis. Ruiz a sigura e portal cu CAFT mester compronde cu seguridad sigur ta un punto cardinal den e parti di crisis social y como tal mester inverti eynan.

INSTRUCCION

E carta di CAFT ta bisa cu ta duna gobierno 7 dia pa contesta den un forma satisfactorio, y cu ta depende di e contestanan, si nan (CAFT) ta bati na porta di Rijksministerraad. Esaki por nifica cu ta conseha Rijksministerraad di posibel incumplimento di Aruba, cu por desemboca den un ‘instruccion’ of un aanwijzing. Ruiz no ta mira e logica di Hulanda pa na e punto aki duna Aruba un ‘aanwijzing. Segun e mandatario, ta trahando 7 luna pa resolve un problema di pasado. No ta asina cu e gobierno aki no a haci nada y merece e aanwijzing. Ademas Ruiz ta razona cu si dado caso mes Hulanda duna Aruba un aanwijzing, e lo bons bek riba nan mes, pasobra e circulo financiero lo caba na Den Haag, ora cu paisnan internacional cuminsa bati na porta di Den Haag pasobra p.e ARub a bay den default cu su cumplimentonan financiero. Y esey ta algo cu Hulanda no kier. A planta scenarionan p.e. di pone un aanwijzing basa riba e problema di personal. Aki Ruiz ta sugeri cu si duna Aruba un aanwijzing pa esey, si esey ta nifica cu Hulanda lo tin cu bay maneha e aspecto aki, y esey por nifica diripiente retiro di personal pa ‘baha e gastonan di personal’? Ruiz ta puntra si esey ta e solucion. Como tal, e mandatario no ta kere cu ta prudente pa Hulanda duna Aruba un aanwijzing awor, y cu si esey sosode mes, e lo afecta Hulanda mes.