ATIA: Rapport CFT causando impacto pa comercio di Aruba

ORANJESTAD – E rapport di e secretariado di College Financieel Toezicht (CFT) ta causando problema no solamente den parlamento y gobierno sino tambe den comercio. E gremio comercial mas grandi di Aruba, Aruba Trade and Industry Association (ATIA) a emiti un boletin, mustrando nan precupacion pa e situacion actual, relaciona cu e rapport. Segun ATIA, e rapport di e secretariado di CFT y e rumornan rond di e rapport ta causando un impacto, tambe pa e sector comercial di Aruba. “ATIA, representando comercio, ta preocupa pa e incertidumbre cu gobierno ta creando”, e boletin ta bisa.

Segun ATIA, e incertidumbre ta pasobra no tin informacion tocante kico lo bay pasa den 2014 y den 2015, sin papia ariba e añanan despues. “ E incertidumbre aki no solamente ta tranca economia pero tin un domino- effect significante pa henter nos pais. ATIA ta haya cu gobierno no ta comunica debidamente y transparante riba asuntonan crucial pa nos economia, locual ta crea speculacion, disturbio y desconfiansa den nos economia, cu tur su consecuencianan”.

Segun ATIA, comercio ta preocupa cu actualmente tin falta di informacion clave pa cu situacion financiero di nos pais y di ahustacionnan riguroso cu gobierno lo (mester) bay hasi. Den “wandelgangen” mester tende cu cierto ahustacionnan lo wordo hasi pa aumenta entrada di gobierno. E hecho cu gobierno sistematicamente, no ta cla na tempo cu su budget fiscal como debe ser bou di un bon maneho fiscal, ta algo cu no por sigui.

Un di e problemanan cu ATIA ta premira ta mas leeuw cu djies e presupuesto no firma di 2014, y esun di 2015. Esaki pasobra e ta stroba e proceso e proceso di prepara e budget 2015 den sector comercial, cu ta pone cu e ta bayendo dificil. Esaki mirando cu e debido informacion encuanto reforma di nos sistema di impuesto y otro, te ainda ta desconoci.

Mescos cu e rapport di CFT ta senjala, tin un silencio hermetico riba con pa baha gasto di personal den sector publico, ‘cual “linksom of rechtsom” mester wordo realisa’. “ATIA ta haya cu loke sea e informacion, bon of malo, comercio mester por wordo informa na tempo riba locual por wordo spera pa asina comercio por tene cuenta”.

ATIA den su boletin, ta mustra cu galta di comunicacion di parti di gobierno riba puntonan cardinal pa comercio ta trece speculacion, disturbio y desconfiansa den nos economia. “Algo desastroso pa nos pais”. Pa comercio ta di suma importancia pa sa kico e plan di gobierno ta bay ta, pa asina comercio por prepara na tempo y debidamente. Transparencia y comunicacion lo por contribui na recupera e confiansa di comercio pa asina por (sigui) inverti y crea mas cupo di trabou. Tanten gobierno retene e silencio, comercio lo no tuma ningun clase di risico financiero, cu tur su consecuencianan. ATIA ta spera cu gobierno cuminsa comparti su direccion y vision mas pronto cu ta posibel den un manera habri.