CAFT: Ainda gobierno no a cumpli cu tur recomendacion

ORANJESTAD – No obstante e contestanan recien di gobierno na CAFT riba presupuesto, ainda e colegio di supervision financiero di Aruba, no ta satisfecho cu loke nan a haya. Y como tal CAFT ta duna gobierno un siman di tempo (te dia 14 di juni) pa ainda cumpli cu e (2) recomendacion cu falta. “Dependiendo di boso reaccion, CAFT lo dicidi si mester avisa Rijksministerraad (ki paso mester tuma). Esaki ta indica cu ainda Aruba no ta ‘fo’i peliger pa haya un instruccion of otro medida di parti di Hulanda. Asina CAFT a informa minister di finanza Xiomara Ruiz Maduro y presidente di Parlamento Ady Thijsen den un carta fecha 7 di juni 2018, y cu a bira publico (riba nan website) diabierna 8 di juni 2018.

LOKE FALTA

E unico di e tres recomendacionnan di CAFT cu gobierno a cumpli cune, ta cu ta mantene e 90% como maximo nivel di quota di debe y no ta aumenta esaki. Pero e otro recomendacionnan manera ‘tene e deficit di 2018 mas abou cu esun di 2017’ y e ‘reduccion di personal’, segun CAFT gobierno no a cumpli cune y ta duna un splicacion pakico.

RDA

Segun CAFT, minister di finanza a sigura cu gobierno a ricibi un prome deposito di Refineria di Aruba (RdA), cu ta dune base suficiente pa inclui e suma di 17.5 miyon den presupuesto 2018. Pero segun CAFT, basa riba e informacion obteni, ainda ta insigur cu e 17.5 miyon lo wordo deposita. Pues, CAFT no tin confianza den loke cu gobierno ta bisando. Segun CAFT, for di e informacion adicional di e mandatario, ‘no tin hechos cu ta mustra cu por considera cu a ricibi e placa y cu esaki ta realistico’. “Pesey CAFT ta ripiti su recomendacion pa tene cuenta cu e coreccion aki, pa laga e deficit den presupuesto 2018 mustra menos cu esun di 2017.

GASTO PERSONAL

Pa loke ta e reduccion di personal, CAFt ta mustra cu, basa di e argumentonan uza di e mandatario, nan (CAFT) no ta convenci cu e gastonan di personal di 2017 pa 2018 mester subi y ta pidi pa ahusta esaki ainda. Loke si CAFt ta aplaudi, ta cu tin un grupo di trabou trahando pa presenta un plan multi annual cu ta mustra un reduccion structural di gasto di personal, y kier pa gobierno presenta nan e plan aki asina cu e ta cla y pa hinca esaki tambe den e concepto di presupuesto pa 2019. CAFT ta papia tambe cu e kier ‘maxima e gastonan di personal’ riba e nivel di e presupuesto adapta di 2017. Eynan e gastonan a keda presupuesta na 379 miyon florin. Mientras cu gobierno a mustra cu e intencion ta pa reduci e gastonan cu 3 miyon pa aña, CAFT ta mustra cu e reduccion structural ta keda completamente perdi door di e crecemento autonomo di 3% (mas of menos 9 miyon) manera poni den e Financieel Economisch Memorandu (FEM). Tambe e mandatario ta informa CAFT cu e aumento di personal menciona, tin di haber completamente cu e aumento ‘temporal di personal’ den cuadro di e ehecucion di e crisis plan. Sinembargo, segun CAFT sigur mitar di e aumento di gasto di personal no tin nada di haber cu e crisis plan. Entre nan pasobra segun CAFT, tin un aumento cu ta pa cubri overtime di polis (2.3 miyon florin) y KIA (1.8 miyon), y extra polis (0.3 miyon), y un sistema nobo di salario di douane (1.2 miyon) segun e ‘nota di cambio’. Segun CAFT, esaki no tin nada di haber cu e plan di crisis social. Por lesa e conseho mas recien di CAFT, AKI.