Compra: Recall di Spam classic no ta conta pa Aruba

ORANJESTAD – Contrario na informacion difundi den curso di dia riba e recall di SPAM, e recall no ta conta pa mercado di Aruba. Asina e distribuidor pa e producto na Aruba, esta Compra NV a informa pa medio di un comunicado diahuebs atardi. Segun e comunicado, en conecion cu e ultimo noticia cu a sali den medionan di prensa y social media, Compra N.V. como distribuidor official di producto nan di marca HORMEL a informa nos comunidad tocante e recall di Spam Classic 12oz. cual aparentemente ta contene fragmento nan chikito di metal den e producto. Mas tempran den dia, Departamento di salud a pidi consumidornan na Aruba pa wak si nan haya e producto aki na Aruba, pa nan debolbe esaki y no usa e producto, indicando e producto por ta na Aruba tambe. Ademas a informa cu nan lo bay check cu 'diferente distribuidor pa determina si e producto a wordo importa'. Pero pa medio di e comunicado di Compra, ta resulta cu esaki awor no ta e caso. 

ARUBA

Compra ta mustra cu en e comunicado oficial di Hormel via su website www.spam.com por tuma nota cu e producto nan cu a wordo afecta no ta conta pa e mercado di Aruba. Compra N.V ta mustra cu como un distribuidor local cu casi 70 aña di experienca nan tin nan cliente, consumidor y nan famia semper na promer lugar y kier asegura cu productonan SPAM distribui door di Compra N.V. no ta afecta. Ademas nan ta mustra cu pa cualkier informacion semper por tuma contacto cu nan oficina na 5824891