Oduber: Proceso pa nombra director nobo di AZV tabata largo

ORANJESTAD – Cu nombracion di Ruben Goedhoop como director nobo di AZV, ta termina un proceso largo pa por a logra e mihor persona pa e trabou. Mientras cu e mandatario encarga cu AZV Dangui Oduber ta papia di un lista di 3 candidato di cual a saca Goedhoop, NoticiaCla por confirma cu tabatin un lista inicial di por lo menos 15 persona, cu despues di algun luna, a keda reduci na un asina yama ‘short list’ di 3 persona di cual finalmente a keda dos. A tene varios reunion cu e candidatonan prome cu a yega asina leu pa nombra e director nobo, NoticiaCla a compronde.

UN CANDIDATO

Finalmente e hunta di comisario a presenta un candidato cu nan a kere ta esun y gobierno mesora a bay di acuerdo cune. “E tabata e candidato cu nos tabata busca, cu a cumpli cu tur e exigencianan, e profil cu nos tabata buscando. E ta un profesional y tin e capacidad y dinamismo pa trece cambio cu nos ta desea den e maneho di AZV” Dangui Oduber a sigui bisa. Esaki ta cuadra cu e campaña cu e mandatario a core pa trece cambio den salud publico.

LEY AZV Un di e puntonan cu kier atende ta e cambio di ley di AZV cu ta uno hopi anticua. “Nos kier mehora e cuido cu ta wordo duna, reduci e costonan cu por” e mandatario a sigui bisa. E director cu a anuncia awe, lo traha hunto cu gobierno y ta kere cu lo ta un bon combinacion.