Goedhoop: Intencion ta pa mehora tur tres pilar di AZV

ORANJESTAD – E director nobo di AZV Ruben Goedhoop ta wak su trabou nobo como un bunita reto. “E ta un organisacion renombra. E ta un organisacion prestigioso” Goedhoop a bisa den su prome declaracion como director. Segun Goedhoop, su bishitanan rond mundo y den region a lague compronde cu hendenan ta impresiona cu e sistema di seguro medico. “Tin biaha ta bon pa realisa kico nos tin” Goedhoop a sigui bisa. “Mesun momento esey no kier men cu e no por mehora” e director nobo a sigui bisa.

ESPACIO PA TRAHA

Minister encarga cu AZV Dangui Oduber a sigura NoticiaCla cu e lo dune e espacio pa traha, claro den margen di ley di AZV. Pero mes momento lo wak si por adapta cierto leynan pa acomoda situacionnan cu a bin ta presenta frecuentemente. Entre nan, ora cu tin casonan specifico, manera Baby Lunah y otronan.

ROL DI AZV

Bek pa e director, segun Goedhoop, AZV tin un tarea hopi importante pa Aruba. “Na fin di dia, nos tur tin te maken cu AZV” e ta bisa, refiriendo cu for di ora cu bo nace, no ta bin den contacto cu AZV. “Ora cu mi a haya un chens pa bira CEO of director nobo di AZV, bo mester tume. Bo mester tume cu dos man y mester step up. Esaki ta mi step up” Goedhoop a sigui bisa, considerando esaki su chens pa aporta pa Aruba riba un nivel nacional.

FOCUS

E enfoke di Goedhoop lo ta e tres pilarnan di AZV, cu ta e calidad di cuido cu mester mehora. E di dos pilar ta e accesibilidad di AZV pa tur hende, na Aruba y den exterior. Aki tambe kier mehora esaki y hacie miho. Y e di tres pilar obvio ta pa controla e gastonan medico. “E tres pilarnan constantemente ta un proceso dinamico cu mester traha cu nan. Nan ta complex, no facil, pero mi ta convenci cu nos por mehora den cada un di e pilarnan” Goedhoop a sigui bisa. A sigura cu e lo haci esaki hunto cu e stakeholders di AZV. Actualmente e ta traha como un di e directornan di PWC y lo cuminsa cu su labor nobo medio augustus.