Jacqueline Cova : Conoce e unico capitan femenino di Insel Air Aruba

ORANJESTAD – E ta e unico capitan femenino di Insel Air y Insel Air Aruba y di Caribe. Jacqueline Cova-Rosa ta conciente di su ‘unicum’ pa e region aki pa awor (tabatin otro capitanan femenino den pasado den Caribe), y como tal no ta sorprendi cu su pasaheronan ta wak straño ora cu nan nota un piloto cu ta capitan tambe, sinta den cockpit. Actualmente Cova ta un di e capitannan di e avionnan Fokker 70. “Señora ta capitan?” ta un di e prome comentarionan cu Cova ta haya semper. “Nan ta confirma si enberdad mi ta piloto si of no, y hopi biaha nan ta puntra si ta mi mes ta bula e avion” Cova ta conta NoticiaCla.com. Cova tabata capitan riba e buelo recien pa tanto Bonaire cu Corsou, ora cu Insel Air a tene su ‘ABC island hop pa invitado (incluyendo prensa).

Cova for di chikito ta bula avion. De hecho, e por a bula avion prome cu e por a core auto caba. “E tipo di avionnan aki mi ta bulando como 8 aña caba, pero mi a cuminsa bula for di ora cu mi tabatin 16 aña” Cova ta sigui conta, cu un sonrisa riba su cara. E pasion pa bula, bula un avion grandi, e tecnica, tur ta motibonan suficiente cu Cova no por pensa di haci algo otro, cu no ta bulamento. “E avionnan, nan ta asina grandi, core duro, spannend, maak mee algo otro” Cova ta sigui conta.

Mientras cu pasaheronan ta wak straño ora cu nan mira Cova den e cockpit, su coleganan masculino no tin ningun problema cune. “Mi no ta ripara nada na colega of algo cu tin un andere verhouding. Tur hende ta igual” Cova ta sigui bisa. Y Cova no tin pensa di stop di bula por lo pronto. “Mi kier bula pa resto di mi bida”, e ta sigui conta.

Pa loke ta e tipo di avion pa cual Insel Air a introduci, Cova ta hopi satisfecho. “E avion mi ta hopi contento cune. Y tambe e destinacionnan cu nos lo bay bula”. Esey no kier men cu e ta mara su mes na fokker 70, pero e ta dispuesto pa bula avionnan mucho mas grandi den futuro. Pa awor, e Fokker 70 ta su ‘vehiculo’, pa cual e ta comfortable. Si e ta keda e unico capitan, no ta conoci. Por lo pronto, e tin e privilegio aki si.