Futuro insigur pa politico boneriano Ramoncito Booi

KRALENDIJK – Antes e cara mas conoci di arena politico boneriano, awe e ta mas bien un sombra, debi na su problemanan cu husticia, aunke cu tur caso presenta, e la gana di un forma of otro. NoticiaCla.com a sinta cu Ramoncito Booi na Bonaire, pa tende kico su situacion actual ta y con e ta mira e ‘situacion nobo’ di Bonaire. Mientras cu awe e ta nenga di ta un politico ‘activo’ cu ambicion pa un posicion den gobierno, Booi ta considera su participacion actual mas bien como un acto di loyalidad.

Ramoncito “Moonchi” Booi, ta asistiendo e lider di partido Union Patriotico Boneriano James Croon, despues cu e ex lider Elvis Tjin A Sjoe a bira lomba pa e partido di un forma cu Booi ta yama ‘no corecto’. “No ta intencion di bai riba lista of figura ningun caminda” Booi ta sigura NoticiaCla.com. Presente na e recepcion recien di Insel Air na Bonaire, Booi a conta NoticiaCla.com riba su situacion despues di e acusacionnan di e.o. corupcion contra su persona y su ‘ambicion politico’.

Segun Booi, no obstante e hecho cu nan (e cu su amigo Burney ElHage) a gana tur nan casonan den corte riba corupcion, e caso di apelacion y tambe den casacion tin e situacion ainda di tal forma cu Booi no por ‘deshaci’ di e pasado ey. “E no a cambia mi bida politico tanto, pasobra ami a keda gana eleccion tur e 5 añanan” Booi ta sigura NoticiaCla.com. Sinembargo, den e aspecto personal si Booi ta conta un otro storia. “E la afecta mi masha masha hopi” Booi a sigui bisa. “Mi no ta bayendo ningun caminda casi pasobra te mesun storia bo ta tende constantemente”.

Financieramente e la manca Booi formalmente pasobra 5 aña e la persigui Booi, di tal forma cu ta dificil pa haci negoshi, y move den comunidad. Si na cuminsamento hendenan no tabata sa di e asunto, awe esey ta diferente. “Ta click bo ta click riba internet y e unico cos cu ta sali, ta cu Ramoncito ta ladron, corupto etc” Booi ta bisa. Como tal, ningun cos bo por haci. E hecho cu Booi tabata na e recepcion di Insel Air, ta debi cu nan si ta duna Booi e balor cu e merece. “Sinembargo otro hende, ora cu bo kier uza bo talento, nan ta click riba internet y bo ta mira cu tur cos ta para” Booi ta sigui bisa. Financieramente tambe Booi ta plat. E nubia ta keda riba su cabes, sin sa kico lo pasa te ora cu e caso di apelacion y Casacion tuma lugar (cu por dura 2 aña mas segun Booi) ‘bo no por haci nada’. Riba e dia di e combersacion cu NoticiaCla.com, Booi a cumpli 67 aña, pero pa Booi, e ta di 6 aña consecutivo cu e ta haci aña, sin cu e por mira un futuro, pasobra ‘bo no sa unda bo ta para’. Mescos ora cu ta habri aña sin sa kico por spera.

Booi no tabatin ningun palabra bunita pa Ministerio Publico, ya cu e forma cu segun Booi, e la wordo trata, tabata nada mas cu algo politico. Drenta su cas y negoshi multiple biaha, cu un meta pa destruye, sin por haya nada. “Danki Dios cu Ramon mi tata a criami manera mi ta” Booi a bisa. Segun Booi, si lo a haci mescos cu otro hendenan politico manera Jopie Abraham (Booi ta menciona nomber) , Nochi Willem y otronan cu a skibi ‘zwartboek’, ‘nan lo ta sera masha dia’.

 NoticiaCla.com a haya reaccion di un di e personanan cu e ta menciona, esta Jopie Abraham, ex lider politico di e partido Democrat. “Ai si, e no a haci nada, ta tur hende rondo di dje a hasi malo, e no” Abraham a bisa NoticiaCla.com. Segun Abraham, esey ta e storia di Booi, cu e lo ta conoci pe.