No ta descarta abuso di prijs fruta y berdura debi na scarcedad

ORANJESTAD – Mirando cu pa hopi tempo tabatin un scarcedad di fruta y berdura na Aruba, cierto comerciantenan ‘lo por haci abuso di e parti akinan”. Asina minister di Economia Xiomara Ruiz Maduro a bisa NoticiaCla riba e posibilidad cu e prijs di fruta y berdura por keda halto, aunke cu frontera habri bek cu Venezuela diahuebs awor. E pregunta ta bin a raiz di e hecho cu na Corsou ora cu a habri frontera cu Venezuela, e prijs pa fruta y berdura a keda halto. Loke si por haci segun e mandatario, ta eherce e control pa esnan cu no tin permiso pa bende cos na Aruba, pa nan wordo controla y no laga e competencia inhusto tuma lugar. “Nos ta pone ordo riba e desordu cu tabatin”.

CORSOU

E mandatario a referi na e situacion di Corsou, unda cu a habri frontera cu Venezuela mas prome, pero cu eynan prijs di fruta y berdura a keda halto. E mandatario di Aruba a haci pregunta na Corsou siman pasa pakico e situacion ta asina. E contesta cu e mandatario a haya, ta cu tin e percepcion ta caro debi cu tin supermercadonan cu ta e mercado mas grandi di e barkitonan di Venezuela, ta cumpra mas hopi fruta y berdura y ta bende na un prijs mas caro. E consumidor cliente di e supermercado, ta custumbra di cumpre mas caro. Pero si e cliente cumpre solamente na e barkito, y no mas na e supermercado, nan ta haya nan mes obliga ta baha e prijs. Ta cuestion di oferta y demanda. Na Aruba tin un freetrade, no por mete man pa controla esaki, pasobra fruta y berdura no ta cay bou di canasta basico.