Representante nobo di Aruba den CAFT ta bira un persona femenino

ORANJESTAD – Gobierno lo reemplaza e representante di Aruba den e colegio di supervision financiero cu un persona femenino na luna di juli proximo. Cu e informacion aki, ta confirma e noticia cu NoticiaCla a trece como primicia luna pasa caba. Segun minister di finanza Xiomara Ruiz Maduro awe mainta na NoticiaCla, Conseho di minister di Reino posiblemente e siman aki lo trata e nombramento di e persona aki y aprob'e.

CAMBIO

Manera cu e portal aki a raporta anteriormente, gobierno a opta pa cambia representante di Aruba den CAFT. Prome minister di Aruba Evelyn Wever a confirma esaki pa NoticiaCla, pero no a bisa ken lo bira e representante nobo. E ley di LAFT ta permiti gobierno di Aruba pa cambia e miembro di Aruba. “Den e proximo simannan nos mester ta cla cu esey” Wever a bisa. “Ta momento cu bo por cambiele, y nos ta haci uso di e momento ey. Ta ora pa cambi’e segun e ley” Wever a bisa. Ta sea bo ta prolonga e persona of bo ta reemplase, y segun Wever a opta pa reemplase.

TINTE POLITICO

E prome mandatario no kier a bay den discusion si ta pasobra e persona actual como representante di Aruba lo tin tinte politico di otro color, esta e partido berde of no. Esaki sinembargo tabata gritonan si den seno di e partido di gobierno, esta cu mester cambia e persona pasobra e lo no ta di confia, awor cu gobierno a cambia di signatura. Wever sinembargo, no kier a bay den e discusion ey. “Mi no ta bay den e discusion di si ta tild’e di tin un color politico si of no” Wever a bisa. Sinembargo, e hecho cu a opta pa cambi’e y no extende su candidatura, ta pone cu gobierno a tuma decision pues pa no sigui cune.

E MIEMBRO ACTUAL

Tabata dia 10 di juli 2015 cu conseho di minister di Reino Hulandes a aproba e candidato Robert “Chobby “ Croes pa bira e miembro di Aruba pa e College Aruba Financieel Toezicht, confirmando e informacion cu NoticiaCla.com a trece como promicia. Conseho di Minister di Reino a aproba e proposicion di prome minister Mike Eman na Hulanda. Desde e conseho di minister di Reino di 12 di juni caba, a bay di acuerdo pa nombra Age Bakker y Sybilla Dekker como presidente y representante di Hulanda, respectivamente. Ambos a keda reemplaza mientrastanto. Croes a cuminsa cu su funcion entrante 1 di augustus, ora cu CAFT a cuminsa opera oficialmente.