Companianan Europeo interesa den proyecto fast ferry pa Aruba

ORANJESTAD – Companianan Europeo ta interesa pa ta envolucra den e proyecto di fast ferry pa Aruba. Asina minister di transporte Chris Romero a bisa dialuna mainta. Entre e combersacionnan teni, a bisa cu a papia cu Ton Jansen cu a duna un impuhe na e proyecto aki unda cu a trece diferente proyecto cu solucion. Fred Olson tambe ta un di e companianan interesa, cu awor ta operando riba islanan manera Tenerife. Segun Romero, nan ta hopi interesa pa bin Aruba. Un otro compania cu gobierno a acerca, ta Acualiner Waterbus na Hulanda. A haci palabracion cu e compania cu nan ta dispuesto pa bin Aruba y haci un assessment di kico mester pa haci e proyecto aki un realidad. E siguiente paso ta pa trece un representante di e compania pa duna presentacion na tanto na conseho di minister y Parlamento.E mandatario a ripiti tambe cu e idea ta pa trece e proyecto aki na San Nicolas.