Minister y lider di MEP den tangana cu otro pa accidente di auto

ORANJESTAD – Un accidente di auto di diasabra mainta, a bira un discusion politico entre partido AVP y MEP henter fin di siman. E accidente mes a tuma lugar diasabra mainta na Colony ora cu un persona a dal un palo di luz. Lider politico di e partido MEP, Evelyn Wever riba su pagina di Facebook a cuestiona e accidente, y a pidi pa confirma si enberdad ta minister Mike de Meza di a hit and run, pa despues e minister en cuestion reacciona na su turno riba su propio pagina di Facebook. E mandatario a reacciona, bisando cu no ta e ta esun cu no ta su persona a causa e accidente, sino un persona yega na dje. NoticiaCla.com mesora a tuma contacto cu e mandatario, sin exito, y a sigui via su coordinadornan, pa tende e version di e mandatario. Algun rato despues, e mandatario mes a reacciona.

KICO A SOSODE

Tabata Wever cu a cuminsa, puntrando riba su Facebook si un hende por a confirma si ta “minister mike de Meza a ‘hit and run’ despues di a pega soño tras di stuur ayera marduga, y dal den palo di lus? Ken por confirma esaki? “. Algun ora despues, minister de Meza mes a reacciona, yamando Wever ‘patetico’ y cu e ‘ mester ta relaciona cu diabel’. “Increibel pero hopi malo”, de Meza ta sigui bisa riba su Facebook page.

REACCION DI MINISTER

E mandatario ta sigui bisa cu contrario na e ‘storia’ cu a sali publica, e ta cu su famia na Merca for di diabierna 3 di october. “Evelyn Wever Croes y Paul Gibbs (otro persona cu a acusa e mandatario riba facebook di e accidente) ta pretende cu I tabata den un accidente diasabra mainta 4 di october, burachi y a causa un hit and run. Increibel” e mandatario ta sigui bisa. “Pero sorry pa boso.. ata ki pa boso: No no ta Mike de Meza!!” e mandatario ta sigui skibi riba su pagina di Facebook.

VERSION DI MINISTER

Segun e mandatario, berdad e auto envolvi di e accidente, tabata e auto di e mandatario, pero maneha pa un conoci di dje cu a haya un blackout y perde control di e auto. E persona ta sufri di diabetis. “Danki Dios cu e ta ok y cu ningun otro persona a sali herida” de Meza ta sigui bisa.

REACCION NA NOTICIACLA.COM

Separa di e dos declaracionnan publico aki, NoticiaCla.com a acerca tanto minister de Meza como lider di partido MEP, Evelyn Wever pa nan reaccion. De Meza no a reacciona ainda, pero Wever si a duna un declaracion breve di e motibo di su reaccion.

“ Mi a lesa cu su auto tabata envolvi den un accidente y ora ma informa cu prensa, ma wordo informa cu e chauffeur a bandona e sitio. Dus mi a cuestiona si ta de Meza” Wever a reacciona na NoticiaCla.com. Ademas segun Wever, e la purba haya confirmacion di Cuerpo Policial, pero ningun hende sa unda e process verbaal ta, y ta haya henter e situacion masha straño. “ Mientras tanto de Meza a reacciona masha rabia ma tende, y el a declara cu e ta na Merca cu su famia. Dus mi ta contento cu no ta e tabata den su auto cu a box, kibra palo di lus, y chauffeur a bandona e sitio”. Wever ademas a sigui bisa cu el a bai hasi un investigacion. “ Y berdad mi a haya un melding di de Meza cu e ta uitlandig pa 1 siman pa trabou, e ora no ta klop cu e ta cu su famia eynan. Ora e meld cu e ta pa trabou kiermeen tur gasto ta paga, pero no pa e bai vakantie cu su famia” Wever ta sigui bisa. Como ehempel, e la relata cu “ p.e. Sievinger tambe a meld cu e ta uitlandig di dia 2 te cu 15 okt pa prive doeleinden, dus e tabata honesto y a bai gewoon weg cu vakantie. Pero de Mesa su melding no ta klop cu su post riba FB. Nos ta bai investiga esaki” Wever a reacciona finalmente na NoticiaCla.com.