Cacho specializa 'Rocky' a ‘steal the show’ diadomingo atardi

ORANJESTAD – Tabatin basta interes pa e presentacion di e cacho specializa Rocky diadomingo. Un grupo di entre 40 pa 50 persona a presenta na e lectura na Kazerne di Bombero na Tanki Flip, unda cu e propietarionan nobo di Rocky, Famia Zimmerman a duna un presentacion na un grupo di entre 40 pa 50 persona cu tabata interesa pa wak kico tur Rocky por a haci. E specialidad di Rocky ta pa detecta nivel di sucu den un persona diabetico. Rocky su specialidad ta lague detecta esaki 20 pa 30 minuut prome cu e nivel di sucu bira alarmante den curpa di e persona. E famia a busca Rocky pa nan yiu di 9 aña esta Jeandrick, cu ta diabetico tipo 1.

INSTRUCTOR

E persona responsabel pa a entrena Rocky, Monica, a trece e cacho for di Merca hunto cu propio cacho cu tambe ta specialisa den e mesun disciplina,  a splica con a entrena e cacho y kico exactamente e cacho por haci y mester haci. Esnan presente a keda hopi impresiona cu e cualidadnan di e cacho, y a haci varios pregunta riba e tema. Despues a bay riba e tema general di diabetisch unda cu a bin sali afo cu tin un problema grandi cu e tema y unda cu hopi ta cana caminda di crus pa por haya ayudo manera mester ta. A mustra nan riba e posibilidad pa trece mas cacho manera Rocky Aruba, y con por haci esaki di e forma mas facil. A mustra cu e gastonan pa prepara un cacho asina no ta barata, pero a haci e esfuerso y sacrificio pa por a trece e cacho aki Aruba, ya cu ta pa salud di nan yiu homber. 

ESTABLECIMENTONAN

Un di e problemanan y reto mas grandi pa e famia cu tin Rocky, ta pa por drenta establecimentonan, hunto cu e cacho pasobra mayoria lugar na Aruba no ta permiti esaki ainda. Na Merca e ta un practica general cu e cachonan specializa ta permiti pa drenta practicamente tur caminda, contal cu nan ta bon identifica cu nan vest special. Aki na Aruba algun lugar te awor a ricibi e famia cu e cacho, pero otronan no. Nan ta spera cu e asunto aki tambe por wordo trata pa e habri caminda pa facilita nan y otro posibel cachonan cu por bin Aruba cu tambe tin un of otro specialidad asina.