Ruiz: CAFT a calcula y interpreta varios cifra di presupuesto robez

ORANJESTAD – Gobierno di Aruba y e colegio di supervision financiero CAFT no ta riba e mesun liña ora di calcula cifra. Despues cu NoticiaCla a publica e reaccion di e colegio riba e presupuesto 2018, minister di finanza Xiomara Ruiz Maduro a manda e portal e reaccion di gobierno riba e tema aki. Y loke ta resalta, ta cu e interpretacion y calculacion entre gobierno y CAFT ta diferente. Algo cu no tabata diferente cu e gobierno anterior. Gobierno a manda bisa CAFT cu nan calculacionnan haci ta incorecto y cu debidamente gobierno a tene cuenta cu tur loke a keda presenta y como tal no tin problema.

COMENTARIO

Den un forma sistematico y cronologico, e mandatario a repasa e puntonan cu CAFT a cuestiona den nan carta di 11 di mei ultimo (cu a keda publica awe diabierna riba nan website). E tres puntonan cu CAFT a mustra di tin problema cune, ta keda adresa. E prome ta e hecho cu e deficit financiero segun CAFT ta sali riba un 3.3% envez di un 2.8% riba e presupuesto. Segun e mandatario, esaki no ta corecto y nan ta kere cu sigur nan lo logra haya e cifranan necesario. Y si esey toch no logra, lo adapta esaki den un presupuesto supletorio fin di aña. CAFT ta basa nan analisis riba e hecho cu nan no tin cierto cifra y como tal mester basa nan mes riba loke nan tin. Gobierno di otro banda ta mustra cu nan si tin e informacion necesario (e.o. deposito miyonario di Rda) cu ta mustra cu nan lo yega e cifranan necesario. Pa loke ta e mantencion di e quota maximo di debe di 90% version 92% cu CAFT ta tilda gobierno di dje, tambe gobierno a mustra cu nan no ta comparti e analisis di CAFT. Esaki pasobra e base cu CAFT ta uza pa haci su calculacionnan, ‘ta basa riba fayo’ y tambe ta haci un ‘interpretacion incorecto’. Pa loke ta e hecho cu gobierno no ta cumpliendo cu un reduccion di personal manera palabra, tambe gobierno a contraresta. Segun e mandatario, no ta asina asina ta reduci e gastonan di personal. Ademas ta mustra cu a tene e suma di gastonan relativamente halto ainda, pendiente casonan sumario andando cu varios ‘arbeidscontractant’. Tambe ta ‘bezig’ cu un plan di personal basa riba termino cortico, mediado y largo, cu ta keda entrega fin di e luna aki. Aki lo mustra un ‘ciclo di control’ mas estricto cu ta sigura cu e cantidad di personal lo keda reduci. E intencion di gobierno segun e mandatario na CAFT, ta pa reduci e gastonan cu por lo menos 3 miyon pa aña.

CAFT

CAFT na su turno awor, a informa e portal aki cu otro siman diahuebs lo presenta gobierno cu nan reaccion riba e contestanan di gobierno, y cu esaki lo bira publico tambe mesora. Lesa e contesta di gobierno AKI.