Carta CAFT di 11 di mei: Aruba no a adapta presupuesto 2018 suficiente

ORANJESTAD – Riba e mesun fecha cu Hulanda a duna Aruba ok pa yega na un surplus di presupuesto den dos aña envez di awor manera inicialmente palabra cu gobierno anterior, CAFT a publica su reaccion di e presupuesto 2018, cu e mensahe cu gobierno no a cumpli suficiente cu nan. “Gobierno di Aruba no a adapta e presupuesto 2018 suficiente cu e consehonan di e colegio di supervision financiero di Aruba (CAFT)”. Asina e rapport di e colegio ta bisa den su reaccion fecha 11 di mei 2018 cu a bira publico awe riba nan website. Den e reaccion di 9 pagina, e colegio ta sigui menciona e lista di puntonan cu e no ta di acuerdo cune y/of cu mester cambia.

REACCION GOBIERNO

Den mesun rosea mester bisa cu, teniendo cuenta cu e fecha di awe (CAFT a pidi gobierno pa reacciona pa 25 di mei ultimo) , minister di Finanza Xiomara Ruiz Maduro a sigura NoticiaCla for di dia 15 di mei ultimo, cu gobierno a contesta CAFT riba e ‘puntonan di bista eroneo’ di Caft di dia 11 di mei ultimo, y cu tur cos a keda aclarea. CAFT no a reacciona ainda na e portal aki si nan a keda satisfecho cu e contestanan. Mientrastanto NoticiaCla a raporta den forma di primicia awe (diabierna) cu Hulanda a bay di acuerdo pa duna Aruba mas tempo (2 aña) pa logra yega na su surplus riba presupuesto. Esaki tabata inicialmente poni pa e aña aki segun e acuerdo di witte donderdag di mei 2015 cu gobierno anterior.

REACCION CAFT

Entre e puntonan cu CAFT ta menciona cu gobierno no a cumpli cune (riba 11 di mei ainda). Ta cu e deficit mester tabata menos na 2018 cu e tabata na 2017. Despues cu a coregi e entrada no realistico di dividendo di varios compania di gobierno, (17.5 miyon di RDA), y un ‘dubbeltelling’ di 6.4 miyon di ATA, gobierno no a cumpli cu e recomendacion aki. Ademas den e presupuesto ta mira cu e gastonan di personal a aumenta cu 10.5 miyon florin cu respecto a e presupuesto 2018. “Cu esaki, no ta cumpli cu e recomendacion pa tuma paso den 2018 pa reduci gastonan di gobierno” CAFT ta sigui bisa. Den cuadro di esaki, CAFT a duna gobierno te cu 25 di mei ultimo, (14 dia despues di e carta fecha 11 di mei), pa informa (CAFT) te na ki altura lo tene cuenta cu e recomendacionnan haci”. Manera e portal aki a bisa caba, gobierno y e respectivo minister as sigura e portal aki cu nan a cumpli cu e fecha aki pa ‘coregi e interpretacion eroneo’ di CAFT’. Lesa e carta completo AKI.