Insel Air Aruba a introduci islanan ABC cu su avion Fokker 70

ORANJESTAD – ‘Insel Air Aruba no solamente ta moldeando e futuro di Aruba, sino tambe pa tur hende cu kier haci negoshi cu e isla aki’. Palabra di e hefe di Insel Air International, Edward Heerenveen na occasion di e introduccion di e avion Fokker 70 na e flota di Insel Air Aruba. A haci esaki cu un buelo pa e otro dos islanan Bonaire y Corsou, tur tres isla den forma di un ‘ABC Hub’. Mientras cu e compania na Aruba ta wardando e documentacion final keda cla pa e avion por cuminsa bula comercialmente, nan a biaha cu un grupo di invitado, -prensa inclui-, pa tanto Bonaire y Corsou como muestra di e ABC hub cu e compania ta creando. “Insel Air ta haciendo un contribucion pa Caribe Hulandes cu lo perdura pasobra bo ta carga e spirito inovativo cu a alimenta e industria aki pa un siglo caba” Heerenveen a sigui bisa.

E delegacion di ehecutivo di Insel Air Aruba y Insel Air International, a inclui un grupo di invitado pa bula pa tanto Bonaire, -prome stop-, y Corsou y asina sera e dos islanan aki conoci oficialmente cu e idea di e hub y e avion. Na cada isla a tene un ceremonia y recepcion chikito, dunando chens na tanto invitadonan cu a inclui prensa local di e respectivo islanan, pa na final di e dia, finalisa e dia bulando bek pa Aruba.

Durante e discurso principal na Corsou, Heerenveen a elogia minister di transporte di Aruba Otmar Oduber, pa su esfuerso pa traha banda banda cu Insel Air Aruba pa asina traha e caminda pa futuro di aviacion na Aruba. E elogio aki no a bin como sorpresa, mirando e hecho cu Oduber recientemente a logra pone presion riba Surnam, logrando cu e pais aki a sucumbi y duna Insel Air Aruba su derecho di aterisahe pa e pais Latino americano recientemente. Algo cu Insel Air tabata hopi contento cune y no a sconde esaki tampoco durante e presentacion. “Su trabou tabata instrumental” Heerenveen a recorda esnan presente durante su discurso na Corsou diabierna merdia.