Oduber: Awe ta dicidi futuro di director di DVG Jerry Staring

ORANJESTAD – Awe decision ta cay riba futuro di e director di Directie Volks Gezondheid (DVG) Jerry Staring. Asina minister di Salud Dangui Oduber a confirma pa NoticiaCla. E mandatario a confirma cu tin basta keho a drenta contra su prestacion, y cu awe decision ta cay si ta pone e director op ‘non-actief’ of si ta lague funciona durante e proceso di investigacion.

KEHO

Segun e mandatario for di siman pasa a ricibi un carta di preocupacion di yen di trahado di DVG. E kehonan ta acusacionnan hopi serio riba funcionamento di e director. A compronde cu no ta prome biaha cu ta ricibi kehonan asina. “Mirando e seriedad di e caso, nos a sigui e proceso cu nos ta suppose di sigui como minister responsabel” Oduber a sigui bisa, indicando cu a tuma contacto cu Departamento di Recurso Humano, cu a guia nan den e proceso. “E conclusion ta cu algo mester sosode” e mandatario a sigui bisa. Un frase a resalta di e conseho cu e mandatario a referi na dje, na Hulandes, esta ‘Het likt onvermijdelijk dat de DVG een nieuwe start moet maken”. Traduci, esaki kier men cu ta mustra inevitable cu DVG mester haci un cambio nobo. Loke esaki ta nifica segun Oduber, ta cu sea mester busca un director nobo of mester bin un reorganizacion.

NON ACTIEF

Pa awe diahuebs, lo tuma e decision riba futuro di e director. Lo cuminsa mes momento un ‘doorlichting’, esta un investigacion interno riba e funcionamento di e departamento cu lo dura 6 siman. “Accion lo wordo tuma y decision lo cay awe kico ta sosode cu e director durante e proceso di doorlichting aki”, Oduber a finalisa bisando.

STARING

Tabata NoticiaCla cu na mei di 2016 a bin cu e primicia cu e gobierno di e tempo ey a apunta Staring como e director nobo. Sinembargo no por a sali cune afo ainda pasobra mester a regla yen di asunto prome cu a keda pega. Pero 5 luna despues na October di e mesun aña, esta 2016, e notificacion oficial a bin cu Staring a keda apunta oficialmente como e director nobo di departamento di salud.