Huez: Ex minister a ignora su departamentonan den caso Island Estates Realty NV

ORANJESTAD – Un biaha mas un huez ta bati dede di un ex mandatario relaciona cu un sentencia riba asunto di tereno berde, indicando cu e (ex) minister no a sigui regla di bon gobernacion y no a sigui regla normal, ignorando su propio departamentonan. Gobierno y Aruba Birdlife Conservation a gana e caso sumario cu e compania Island Estates Realty NV a entama contra nan. Ta trata un caso unda cu e compania kier a pone huez forza gobierno actual coopera y duna nan e derecho di erfpacht riba un tereno cu ta cay parcialmente den tereno berde. Y si no cumpli, pa multa gobierno cu suma miyonario. Huez sinembargo a dicta diferente, y mustra cu debi e.o. na mal actuacion di gobierno anterior, cu gobierno actual tin tur derecho di nenga di coopera cu e compania y asina rechasa di duna nan e tereno den erfpacht.

E CASO

E compania Island Estates Realty NV a entama un caso contra gobierno, pasobra na januari ultimo gobierno a nenga di otorga nan e extencion riba erfpacht riba un tereno cu ta parcialmente riba e tereno berde, protehi pa e Ruimtelijk Ontwikkelings Plan. Segun defensa di e compania, gobierno anterior a otorga nan tur documento necesario y como tal e compania a haci gastonan caba pa cu e proyecto. Como tal nan kier pa huez ordena gobierno actual pa continua cu e maneho ey, y sino e mester paga un multa miyonario di 3.076.940 pa daño cu esaki ta causando e compania y su proyecto.

E PROYECTO

Repasando e trayectoria di e proyecto, por a nota cu constantemente e compania for di prome biaha cu el a entrega e peticion pa e tereno na 2013, a keda pidi cambio di e.o. destinacion di e proyecto, aumenta e tereno etc. Y segun huez, ta notable cu cada bez cu e peticion bin na e minister anterior (lesa Benny Sevinger), e minister tabata aproba e peticion riba e mesun dia cu e peticion drenta. Osea, segun huez, ta mustra cu e minister no a tuma e decision cu conseho di departamentonan concerni.

ACTUACION DI GOBIERNO

Riba e argumentacion si gobierno actual mester cumpli cu e peticion di e compania, huez a mustra cu tin cu analisa esaki di varios angulo. Sigur si mester tene cuenta cu un comunidad mester por tin confianza cu compromisonan cera cu un gobierno mester wordo respeta. Y pa por contesta esaki, huez mester a analisa varios aspecto den e caso. Entre otro si gobierno anterior a actua conforme reglanan di bon gobernacion of no. Pa por desvia di e ROP, manera cu e compania a informa den corte, gobierno y partidonan en cuestion mester a actua conforme principio di bon gobernacion. Pero for di e decisionnan presenta, y e forma con e acuerdo entre gobierno anterior y e compania a keda cera, no por deduci esey. Y mirando tambe cu cada bez cu e compania tabata pidi pa cambio di destinacion y otro asunto, e minister tabata acorda esaki riba e mesun dia, sin cu departamentonan a haya chens pa investiga e peticion, esaki ta malo pasobra ‘tin suficiente motibo pa investiga un peticion asina mirando e embergadura di e desaroyonan en cuestion riba e aspectonan natural di e tereno berde’. Ademas segun huez, por deduci cu mientars cu e ex minister den silencio a aproba e rapport ambiental, no por deduci cu departamentonan di gobierno a duna nan conseho riba esaki. E minister, segun huez, no tabatin derecho di usa e rapport aki sin conseho y evaluacion di e departamentonan concerni. “Ademas e (ex) minister no a dedica ningun atencion na e comentario di e hefe di departamento di DIP. Mirando tur esaki, e pensamento di gobierno actual cu e no mester coopera mirando cu e forma con tur cos a sosode tabata contra regla procedural y maneho y bon gobernacion di e gobierno anterior. Y finalmente, dificilmente por duna e compania razon, mirando cu no por determina cua parti di e tereno ta cay den e area berde, y como tal no por deduci e impacto. Ta despues di esey por deduci te na ki nivel a desvia di e ROP y con e efecto por ta. Lesa e veredicto AKI.