Cacho cu por alerta hende diabetico, ta na caminda pa Aruba

ORANJESTAD – E Labrador Retriever Rocky ta na caminda pa Aruba e siman aki for di Merca. Loke ta haci esaki special ta cu Rocky lo bira e prome cacho na Aruba specialisa den detecta nivel diabetico, mas specifico ‘hypoglycemia y hyperglycemia den personanan diabetico. E cacho tin como tarea pa vigila un hoben y alerta esaki ora cu su nivel di sucu bira mucho peligroso. E cacho ta uno entrena special pa e tarea aki. NoticiaCla a compronde cu e cacho aki lo yega Aruba fin di siman y lo tin un presentacion pa hende cu tin familianan cu tambe tin e malesa aki.

SERVICE DOGS

Cachonan hopi biaha ta wordo entrena den cierto disciplina pa asisti hende. Entre nan e disciplina mas conoci ta esun di yuda hende ciego, droga y compania social. Den e caso aki, Aruba ta conoci su prome cacho cu por asisti hende diabetico (sigur mucha), y alerta nan y nan familiarnan ora cu tin un peliger. Den e caso specifico aki, Rocky por detecta p.e. 30 minuut prome cu e nivel di peliger den e persona diabetico bira critico te na un nivel cu e por bay den coma. Prome cu esey sosode, e ta alerta e persona, y tambe esnan rond di dje. Ora cu e persona ta na tino, of lanta esey no ta un problema pa esnan rond di dje detecta esey. E situacion ta bira un problema ora cu e persona en cuestion ta drumi. Den e caso aki, e cacho ta detecta e situacion y ta lanta e persona prome cu e haya problema.

INFORMACION

E famia cu a manda busca e cacho aki, kier comparti e conocemento aki cu mas persona cu tambe tin un tipo di problema asina y a organiza un atardi di informacion diadomingo awor den un di e localnan na e post di bombero na Hato. Esaki lo tuma lugar entre 6’or y 8’or di anochi. Durante e session aki, esnan interesa por haya mas informacion di e.o. e persona cu a entrena e cacho aki y tambe e famia.