Wever: Hulanda kier Aruba drecha finanzas prome cu atende cu Venezuela

DEN HAAG – Hulanda kier pa Aruba atende su problema financiero prome y despues por atende cu asunto di Venezuela. Asina prome minister di Aruba Evelyn Wever Croes a bisa di ta sinti despues di su combersacion cu secretario di estado Hulandes Raymond Knops. Ambos (finanzas y Venezuela) tema tabata riba agenda durante e reunion entre Knops y e prome mandatario di Aruba cu ta na Hulanda pa un bishita di trabou. Asina mes Wever ta sinti cu e reunion a bay bon.

VENEZUELA

Wever a indica tur e esfuersonan cu Gobierno di Aruba a haci y e pasonan cu ta tumando pa garantisa e trankilidad na Aruba mes. “ E situacion na Venezuela ta sigui delicado cu ta pone cu mas Venezolanonan lo kier sali for di Venezuela y drenta Aruba ilegalmente cu ta algo hopi preocupante pa Gobierno di Aruba” Wever a sigui bisa.

ATENCION

E Premier di Aruba ta duna di conoce cu Hulanda tin atencion pa e tema aki cu ta un tema compleho y hopi delicado. Pero e mandatario prinicipal di nos pais ta sinti cu Hulanda kier mira Gobierno di Aruba atende cu problema financiero di Aruba prome. “Despues cu pone ordo den tur e desordo cu tin financieramente, por atende cu e tema di Venezuela tambe”. Y na final a enfatisa cu e reunionnan ta bayendo hopi bon. “Poco poco Hulanda ta haya confiansa bek den nos pais. Ta sinti e dificultad cu, debi na e mal maneho di Gobierno di AVP, nos ta haya nos cu n’e na Hulanda sinembargo mi mester bisa cu poco poco bo ta sinti cu e confiansa ta bin bek. Esaki ta yena mi cu hopi satisfaccion. Mi ta sigur cu asina aki hunto nos por yega na un miho solucion pa e pueblo di Aruba. Esfuersonan ta wordo haci pa poco poco e confiansa wordo reestableci”. Wever a finalisa bisando.