Geschillenregeling riba agenda di IPKO diaranson

DEN HAAG – E tema controversial ‘geschillenregeling’ ta riba agenda atrobe na IPKO, y ta wordo trata diaranson awor, banda di e situacion politico na Venezuela y e posibel consecuencianan pa cu Caribe Hulandes. Ta apenas luna pasa cu secretario di estado pa asuntonan di Reino Raymond Knops bisa cu ta pone e tema ‘on hold’. Motibo ta prioridad e momento ey tabata riba reconstruccion di e isla di St Maarten despues di horcan Irma

INDEPENDIENTE

E asunto di e geschillenregeling ta un sumpiña den wowo di Hulanda, pasobra segun Hulanda, e ta kita autoridad di e islanan en cuestion. Den varios intento, e caso a para ora cu e islanan no por a haya otro riba e tema. Un di e problemanan tabata ken ta forma parti di e comision cu tin cu bay haci e trabou, y tambe e forma con e ‘decision’ di un geschil ta wordo determina. Hulanda tabata contra cu e decision ta ‘bindend’ esta definitivo. Hulanda semper a opta pa un decision di e resultado di e geschillenregeling por ta simplemente un ‘conseho’ pero cu Hulanda tin e ultimo palabra. Algo cu Aruba, St Maarten y Corsou a bringa semper.

CASONAN

E ultimo añanan, e urgencia pa tin un geschillenregeling tabata mas evidente, ora cu e.o. tabatin e problema na 2014 ora cu Aruba no tabata di acuerdo cu Hulanda riba e asunto di presupuesto. Hulanda e tempo ey a no kier a acepta e presupuesto, y como protesta, e prome minister di e tempo ey Mike Eman a bay den un welga di hamber. St Maarten tambe tabatin su problemanan cu Hulanda pa cual e tabatin necesidad di un geschillenregeling ora cu Hulanda kier a mete pa loke ta screening di candidatonan pa minister. Pero esaki cada bez tabata wordo posponi. Ultimo reunion di IPKO e tema no tabata riba agenda. Awor e ta bek, unda cu lo mester didici kico e delegacionnan ta bin cune. Den pasado Hulanda su delegacion a bay di acuerdo cu e otro delegacionnan, pero a sucumbi despues pa presion di nan gobierno. Y cos a bolbe pega.

20 aña

E palabracion pa un geschillenregeling ta riba agenda durante 20 aña caba. E tempo ey na 1993, Aruba a palabra cu ex minister Ruud Lubbers cu lo a bin un geschillenregeling. E presion riba Hulanda a aumenta ora cu Corsou y St Maarten tambe a bira autonomo na 2010. Raad van State kier pa gabinete Hulandes haci lihe cu e asunto. Esaki pasobra e relacion entre Hulanda y islanan no a mehora. “Cada bes ta surgi disputa despues di cual e combersacion ta pega” e rapport di 2017 a bisa.