Grupo di trabou pa inventariza problema cu uso di hulandes pa examen local

Grupo di trabou pa inventariza problema cu uso di hulandes pa examen local

Posted on 05/28/2018 5:07 pm AST | Updated on 05/28/2018 6:17 pm AST

ORANJESTAD – Basa riba un articulo di e docente di Hulandes Arnoud Kuijpers na Colegio Arubano San Nicolas recientemente, -cu a bay viral-, tratando e tema di examen di scol na Hulandes, minister encarga Rudy Lampe a anuncia dialuna cu lo instrui un grupo di trabou pa haci un inventarizacion di e problematica aki y presenta posibel solucionnan pa duna un ‘fair chance’ na tur hobennan cu ta afecta pa esaki.

EXAMEN DIFICIL

Como ehempel, Lampe a referi na examen di scheikunde recientemente unda cu e texto pa describi e problema pa soluciona, tabata asina dificil, cu e studiantenan tabatin problema cune. A parse mas cu nan tabata wordo examina riba nan conocemento di Hulandes, envez di scheikunde. Parlamentario pa partido MEP Sue-Ann Ras, tambe presente na e conferencia, a duna un ehempel tambe di su propio yiu muher, cu a haya un 9 pa aardrijkskunde, pero no por a haya un 10, pasobra e la skibi nomber di e pais na papiamento (Argentina), envez di Hulandes (Argentinië). Ora cu esaki a bira conoci, Ras a splica cu e la drenta den un discuscion pisa cu e maneho di scol, y no ta haya ainda e cos ‘fair’ cu ta test mucha riba e idioma, envez di e materia. Ras prome di a bira parlamentario, tabata docente di profesion y un experto riba e materia di papiamento. 

ARNOUD KUIJPERS

E docente di Hulandes na Colegio Arubano San Nicolas ta esun cu recientemente a crea un ola di reaccion (bon y malo) riba e uso di hulandes como idioma pa examen local. Segun Kuijpers, e unico rato cu su alumnonan ta papia Hulandes ta den klas ora di les. Riba speelplaats durante recreo ta papiamento y tur otro caminda ta papia papiamento. “Den mi klas nan mester papia hulandes. E metodonan tur ta for di Hulanda, unda tur cos ta den contexto Hulandes, y tur cos ta referi na Hulanda” e docente a cuminsa splica. “Tur esaki mientras cu mi alumnonan ta biba na Aruba” e docente a sigui bisa. Y ta e inquietud aki tabata e base pa su articulo publica den e corant Hulandes Amigoe di Aruba recientemente. E ta conoci di ta bringa pa derecho di su alumnonan. “No ta husto cu alumnonan aki tin cu haci tur cos na Hulandes” e docente a bisa, refiriendo cu nan tin cu siña tur cos na Hulandes. E examen ta exactamente mescos cu na Hulanda, y esaki no ta husto segun e docente. “Nos ta haci mescos como si fuera Hulandes ta nan lenga materno, pero aki Hulandes no ta nan lenga materno. Pa mi sentimento, Hulandes ta un idioma morto” Kuypers a sigui bisa. “E idioma (Hulandes) por lo menos no ta biba entre e hobennan na scol. Mi ta scucha ingles, spaño y papiamento. Pero nada di Hulandes. Pakico e alumnonan aki mester traha e examens na Hulandes” e docente a sigui bisa. Como tal, ta tene e alumnonan bobo. E ta algo cu segun e docente, ta frustra e alumnonan den su klas. E alumnonan ta bisa e docente cu nan ta compronde e materia, pero no ta compronde e idioma den cual ta haci e pregunta riba examen.

STROUCKEN

Un otro docente cu tambe ta duna Hulandes na e scol, Esther Stroucken, tin e mesun experiencia pero mas tempo na e scol. E motibo pakico e no por a ‘bati e bel’ prome, ta pasobra e tempo ey (23 aña pasa) e aceptacion pa papiamento na scol simplemente no tabatey. Como tal e lo a haya resistencia y no lo a yega leu. Awe, e situacion ta di tal forma, cu hende ta pensa diferente, y cu ta pone tambe cu Kuijpers su articulo a hala asina hopi atencion.

 

 

  • Powered by SETAR