Wever: Delegacion ta bay Venezuela riba tema di habri frontera

ORANJESTAD— Gobierno di Aruba a dicidi cu ta manda un delegacion di profesional di Aruba pa Venezuela, estado Falcon otro siman pa purba yega na palabracionnan den aspecto di seguridad y documentacion cu mester exigi na momento di importacion. “Si esaki logra, lo por logra habri tambe e frontera y por permiti como excepcion importacion di fruta, berdura y pisca” Prome minister di Aruba Evelyn Wever Croes a declara diabierna. Segun e mandatario, di parti di Venezuela no ta ricibiendo niun cooperacion cu por yega na apertura di e Waf mas lihe. Mientrastanto Wever y coleganan Ruiz y Bikker a reuni cu autoridad riba e tema.

HABRI WAF

Wever a indica cu e meta di e reunionnan ta pa explora si por logra habri e Waf prome cu dia 6 di juni pa importa productonan cu ta fruta, berdura y pisca. Pa motibonan di siguridad, esaki no ta deseabel. Y ademas, segun e mandatario, di parti di Venezuela no ta ricibiendo niun cooperacion cu por yega na apertura di e Waf mas lihe. Pesey e decision di diahuebs pa manda un delegacion Venezuela. Si logra habri e frontera maritimo, esaki lo no nifica cu a yega na normalidad di haci negoshi pero por lo menos lo por yuda cu nos por importa e productonan aki na un prijs mas rasonabel.

NEGOSASHON DIFICIL

Wever a bisa tambe cu e negosacionnan cu Venezuela ta bayendo hopi dificil. Pa Aruba e aspecto di siguridad na Waf ta hopi importante. Y Aruba lo habri e Waf un biaha mas solamente ora Aruba ta sinti comfortabel cu e nivel di siguridad pa cu transporte di carga y di hende. Mientras tanto, Wever, riba peticion di hopi ciudadano ta haciendo tur lo posibel pa por yega na habri e frontera pa importa fruta, berdura y pisca.