Radio emisoranan di Aruba a firma cu Buma/Stemra pa paga royalties

AMSTERDAM/ORANJESTAD – Un total di 21 radio emisora di Aruba (tur) a firma un rato pasa cu BUMA/STEMRA na Hulanda pa asina paga tur autor di musica nan derecho. E contract a wordo firma pa Aldrich Croes di Aruba Broadcasting Association cu Casper Keller di Buma/Stemra, den representacion di tur e radionan na Aruba. NoticiaCla a confirma cu Aldrich Croes for di Hulanda. Segun Buma/Stemra, ta contento cu e firmamento y ta spera cu e lista lo crece.

FORMULA

BUMA/STEMRA ta cobra den dos forma. Uno basa riba e entrada di e radio, y tambe riba e cantidad di habitante cu tin riba e isla. Esaki ta mas bien pa sigura cu e forma di pago, ta mas rasonabel, y no ta kibra e emisoranan. E ta evita cu e cobranza ta demasiado pa e emisoranan, y cu e cobranza inicial sugeri pa SOCAN, lo tabata mucho hopi y tabata menasa e existencia di algun radio na Aruba.

REACCION KOCK

For di abogado David Kock cu ta representa e grupo DUCAPRO y SOCAN cu tabata e grupo cu a cuminsa cu e asunto mas tempran den aña pa cobra pa royalties, a duna un reaccion breve pa NoticiaCla. Segun Kock, e asunto awor ta cambia unda cu envez di Socan, ta Buma lo paga. “Y e artistanan representa door di Socan, lo haya nan derecho via nan agreement cu Buma. Cu esaki e cobro di royalties tambe ta wordo concretisa. Algo cu e radionan a bisa cu lo no tabata posibel” Kock a bisa den un reaccion breve. E la keda breve mirando cu e no a mira e acuerdo cu Buma ainda. Pero segun Kock, e asunto ta cu awor por lo menos e radionan lo paga pa toca muziek di e artistanan.