- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
- Cooperacion mas estrecho entre e parti Caribense di Reino y Hulanda riba tereno di enseñansa i investigacion
- Conocido ciudadano y ex director di KIA Ben King a haya despedida impresionante
ATIA: Consecuencia serio causa pa fayo mecanico di barco
ORANJESTAD - Siman pasa, riba 15 di mei, ATIA a wordo informa di un problema cu un di e barconan den uso di e compania “King Ocean” rumbo pa entre otro Aruba. E barco concerni a hanja problema mecanico y consecuentemente a desvia pa Jamaica caminda e barco aki a wordo repara. E problema cu esaki a causa pa Aruba tawata grandi, causando cu basta producto y, mas importante, fruta y berdura no tawata disponibel na Aruba. Asina e gremio comercial ATIA ta raporta den un comunicado. Segun e gremio, Aruba ta depende hopi ariba e barco di King Ocean pa mayoria di comestibel y mercancia cu ta drenta Aruba, y e incidente cu e barco aki a mustra e consecuencia cu restraso of desviacion tin ariba economia di nos isla.
ATIA a reacciona mesora riba e notificacion aki, tumando contacto directo cu King Ocean pa asina ricibi detayes di e problemanan andando cu e barco. King Ocean na su turno a reacciona riba e carta di ATIA y a tene ATIA altanto di e situacion. King Ocean a reitera cu nan tambe ta wak e urgencia di e situacion y nan lo hasi nan maximo esfuerzo pa e containernan yega Aruba lo mas pronto posibel.
Lamentablemente ATIA a bin ta teme un situacion asina aki pa algun tempo caba, caminda Aruba ta depende pa mayoria di comestible riba un linja di carga, y si esaki pa cualkier motibo fuera di nan control hanja problema, Aruba su comerciantenan, consumidornan, sector turistico y economia ta sufri consecuencia grave. ATIA lo a prefera pa tin mas opcionan den e area aki pa asina disminui e efecto cu Aruba ta keda sin comestibel y cierto mercancia. ATIA sa cu esaki no ta fasil, mirando cu Aruba ta keda pafor di mayoria ruta usual di barconan di carga y e mercado ta uno relativamente chikito. ATIA ta reitira con importante e ta pa ofrece un servicio eficiente den nan nos waf y lo ta bale la pena explora opcionan cu ta hasi Aruba atractivo pa mas linjanan di carga tuma e ruta pa Aruba, asina disminuyendo riesgo di un situacion similar na Aruba.
ATIA ta intermediando tambe entre e linjanan di cargo, ASTEC y demas stakeholders pa mehoracion di servicio y soluciona algun reto cu ta afecta e operacion eficiente di nos waf. E meta ta pa comercio y pueblo di Aruba por disfruta di un bon servicio y cu e fluho di mercancia y comestibel ta uno constante y confiabel.
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
DEACI a otorga mas di 100 permiso pa negoshi nobo caba den 2024
ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
Durante Seatrade 2024, islanan ABC a trata esfuersonan pa desaroyo regional
ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.
Follow NoticiaCla
