Total di 11.427 caso pa corte di husticia na 2017 na Aruba

ORANJESTAD - Na aña 2017 a entrega un total di 44.067 caso na e Cortenan di Prome Instancia. Na Aruba a drenta 11.427 caso, Corsou 26.105, Sint Maarten 4.499 i BES 2.036. Na 2016 a entrega un total di 37.510 caso, pues, tabatin un cresemento di 17%. Principalmente subida di 24% di casonan penal a atribui na e subida. Na 2017 a procesa 22% mas caso, den comparacion cu 2016. E subida mas substancial (65%) ta den Derecho administrativo (casonan di belasting) na tur oficina. E subida ta consecuencia directo di e e cantidad di casonan pa aña na e diferente oficinanan.

E totalidad di casonan den apelacion cu a entrega a baha cu mas o menos 8%, di 811 den 2016 pa 743 den 2017. Por observa e bahada aki principalmente den casonan civil (-16%) i casonan di ambtenaar (-9%). Esaki ta un nota positivo, ya cu e cantidad di casonan, di e categoria aki, conclui den prome instancia ta mustra hustamente un subida. Esaki ta implica cu e persona cu tabata busca su derecho aña pasa, tabatin menos biaha un motibo pa apela tog, despues di e veredicto den prome instancia.