Paesch na huez: ‘Ta normal cu mi ta para aki sin sa pakico?’

ORANJESTAD – Pa casa di ex minister Paul Croes, Melony Paesch, tabata un sorpresa cu e mester a presenta dilanti mesa berde diaranson como un sospechoso den caso Ibis. Pa otronan tambe mirando cu e no a wordo menciona prome como sospechoso. Su nomber sinembargo tabata poni riba e rol di Corte pa presenta tambe como sospechoso. Algo cu el a cuestiona severamente den corte diaranson mainta.

DIRIGI NA HUEZ

Tabata na final di e tratamento di e regiezitting diaranson mainta, cu huez a puntra Paesch (mescos cu a haci un rato prome cu su casa Paul) si e kier dirigi su mes na huez. Paesch a acepta y tabata bisto cu el a bin prepara pa dirigi su mes na corte, ya cu e tabatin un papel di cual el a lesa su declaracion. Den un tono hopi emocional y bou di lagrima, Paesch a cuestiona e necesidad di ta eynan. “Mi ta hopi asombra” Paesch a cuminsa na bisa. “Mi no por defende mi caso, pasobra mi no sa di kico mi ta wordo culpa” Paesch a bisa. “Bo ta haya normal cu y ta para aki y no sa pakico” Paesch a puntra huez. “Mi ta exigi un dossier completo pa mi por defende mi curpa. Esaki no ta corecto” Paesch a sigui bisa. El a referi tambe na e momentonan cu tabatin entrada hudicial na su cas, unda cu su dos yiunan mester a experiencia esaki. “Mi ta para riba mi inocencia” Paesch a finalisa bisando, den un tono emocional. Mientras cu Paesch a bisa den corte cu e no sa pakico e ta un sospechoso y di kico e ta wordo acusa, esaki tabata stipula den e rol. E ta wordo acusa formalmente di dos cargo, esta, empleo di un persona indocumenta conhuntamente cu otro of otronan den e periodo di 20 di december 2016 te 28 di maart 2017. Pone un persona den ocasion pa e viola LTU den e periodo aki. Mas subsidiario, laga un persona indocumenta traha, y labamento di placa (gewoonte witwassen) conhuntamente cu otro of otronan den e periodo di prome di januari 2014 pa 28 di maart 2017.