Paul Croes den Corte: Mi kier sa di kico exacto mi ta wordo culpa

ORANJESTAD – “Mi ta para aki cu sentimento mixto. Alivia cu e caso a cuminsa pero alavez desapunta pa e forma con ministerio publico ta trata e caso” tabata e prome palabranan di e ex minister Paul Croes dirigi na e huez cu a trata e regiezitting di caso Ibis awe. Tabata practicamente na final di e caso, cu huez a duna Croes y otro sospechosonan e oportunidad pa dirigi nan mes na e huez. E casa di Croes, Melony Paesch tambe a hiba palabra, pero Giovanni Capriles, no tabatin e necesidad ey. “Mi consenshi ta limpi. Mi ta laga mi abogado haci su trabou”, Capriles a bisa. E otro dos sospechosonan Roque Aparicio y Selma Arends no a hiba palabra.

CROES

Tabatin hopi interes pa e declaracion di Croes, mirando cu a resulta cu Croes a usa su derecho di ‘keda keto’, (zwijgrecht) tur e tempo aki. Croes a cuminsa na splica cu e tin sentimento mixto. E ta alivia cu e caso a cuminsa pero nada contento cu e forma con ministerio publico ta trata e caso. “E tabata un periodo hopi pisa pa (nos) famia” Croes a sigui bisa. El a referi tambe na e periodo ‘largo’ cu ministerio publico a dedica na e investigacion. “A dedica dos aña na un investigacion. Un investigacion profundo. Y ainda no ta cla cu investigacion” Croes a sigui bisa den corte.”Mi ta desapunta, mi ta rabia” e ex mandatario a bisa. A referi na e 20.000 documento cu el a ricibi apenas 6 siman, y cu no tabatin tempo suficiente pa prepara pa esaki. “Esaki ta prueba cu e informacion no ta cuadra. Banda di e hecho cu e ta un tempo hopi cortico, (ainda) tin cierto dossier cu no ta completo”. E la referi na e sumanan cu ta wordo menciona, pero cu no tin ningun cifra completo. “Si mi mester defende mi mes, mi mester por sa pakico mi mester defende mi mes” Croes a sigui bisa. Berdad cu haci fout ta humano (refiriendo cu OM a bisa cu aki aya por a omete cierto documento y papel), pero ta sinti cu a stroba su derecho di defende su mes. Y basa riba esey, entre otro Croes a opta pa usa su derecho di ‘keda keto’. Ademas e hecho cu tin yen di hende cu ta djis declara cos contra dje, e mester sa sigur prome kico tur a keda declara. Croes a bay bek na e periodo cu e tabata deteni 10 dia den un cel, unda cu anochi 9’or y mei e la haya 20 minuut pa repasa cantidad di documento bou di luz di flashlight, pa por defende su curpa su manese.

HORCAN IRMA

Croes a conta di su detencion cu mester a dura 2 siman pero cu finalmente a dura 80 dia. “Mi a sinta 80 dia bou ‘restriccion’. A bisami cu e lo dura 2 siman” Croes a sigui bisa. Pero a bisami cu ta debi cu tabatin horcan Irma cu a azota Isla Riba, mester a manda personal di Ministerio Publico pa e islanan ey pa por traha eynan. Pues no tabatin personal pa sigui cu e caso Ibis. “Con mi por tin confianza den un proceso aki” Croes a sigui bisa. Ademas e ta puntra su mes con e por haci declaracion bou di e circumstancianan aki. “Pesey mi a uza mi ‘derecho di keda keto. Mi kier claridad. Mi ta haya simplemente cu esaki no por. No ta normal loke ta pasando cu mi caso” Croes a sigui bisa. Y finalmente, e la bisa “Mi kier sa specificamente di kico mi ta wordo culpa”. Oficialmente e ta wordo acusa di 6 cargo, for di corupcion pasivo conhuntamente cu otro of otronan, en contra di su deber den e periodo di prome di januari 2014 te 28 di maart 2017, ambtsmisbruik conhuntamente cu otro of otronan den e periodo di 20 di april 2015 te 30 di januari 2017, malversacion conhuntamente cu otro of otronan di placa di e fundacion S.L.&E. den e periodo di 18 di december 2014 pa 28 di maart 2017, labamento di placa (gewoonte witwassen) conhuntamente cu otro of otronan den e periodo di prome di januari 2014 pa 28 di maart 2017, empleo di un persona indocumenta conhuntamente cu otro of otronan den e periodo di 20 di december 2016 te 28 di maart 2017. Pone un persona den ocasion pa e viola LTU den e periodo aki. Mas subsidiario, laga un persona indocumenta traha, participacion na un organizacion criminal den e periodo di prome di januari 2014 te 28 di maart 2017. E cargonan ey mester wordo proba pa Ministerio Publico ora cu e caso bin dilanti.