ORANJESTAD – E caso penal Ibis cu ex minister di Aruba Paul Croes como sospechoso principal tabata porta ‘solamente’ un regiezitting diaranson mainta, pero e atencion cu el a hala, tabata grandi. Den e caso aki, unda cu fuera di Croes, a presenta 5 sospechoso, no solamente a pidi pa p.e. tende mas testigo, scucha grabacion di telefon getapt, pero a te hasta pidi pa un di dos regiezitting.
DESICION
Huez na final a aproba e di dos regiezitting (poni pa September) y a permiti pa ambos partido scucha varios testigo. A limita e peticion general di scucha audio di grabacionnan telefonico pero si, si e ta un peticion conciso di un caso specifico. E fecha pa e caso mes tuma lugar, ta poni pa mas tempran fin di aña. Huez a ‘hou aan’ e caso por lo pronto.
INTERES
E interes pa e caso tabata mas grandi cu normal, si tene cuenta cu esaki tabata ‘simplemente’ un regiezitting. Pero e hecho cu ta trata di un ex mandatario, a dune e ‘saus’ necesario pa hala atencion. Ademas, e speculacion si Croes y e otro sospechosonan mes lo a presenta, tabata grandi. Y Croes no a defrauda aki. Acompaña pa su señora (cu tambe ta un sospechoso awor), Croes a presenta den corte y na entrada di corte a te hasta hiba algun palabra. Fuera di interes grandi di prensa, tabatin interes legal tambe, unda cu a mira varios abogado cu a bin di interes personal.
FISCAL
Ministerio Publico su fiscalnan a presenta e cargonan pa e respectivo sospechosonan den sala, esta Paul Croes, Melony Paesch, Roque Aparicio, Selma Arends y Giovanny Capriles y a indica cu lo trata nan simultaneamente pero no hunto. A mustra cu e investigacion ainda ta andando, y ta un trabou grandi di 1 ½ di investigacion riguroso. A pidi tambe pa scucha Croes como testigo, y ta spera cu e biaha aki si e papia ya cu a sali na cla cu Croes ta usando su derecho di ‘no bisa nada’.
DEFENSA
E prome pa hiba defensa tabata abogado pa Croes y Paesch, Damis Illis cu a yama e caso ‘incomprendible’ y a pidi pa mas tempo pa por prepara nan mes. Ta apenas 6 siman pasa a haya 20 mil documento pa por a prepara nan mes, y ainda no tin tur documento cu nan mester. “Nos mester di mas tempo pa por prepara pa e caso completo aki” e abogado a bisa. Ta aki a tende di e prome peticion pa un di dos regiezitting, pa duna mas tempo pa prepara. E hecho cu OM ta trahando 2 aña caba riba e caso y ainda no tin tur informacion, ‘no ta mucho honesto’, pa bise di un forma ‘suave’. A haci peticion pa scucha 32 testigo. Pa loke ta e caso di e casa di Croes, Paesch, tin problema pa formula un peticion di investigacion, pasobra simplemente no tin un dossier suficiente. Pues no sa pakico e ta sospechoso y como tal ta dificil pa prepara pa su caso. Abogado Chris Lejuez ta defende Selma Arends y Giovanni Capriles y a pidi pa trece cambio den e ‘dagvaarding’ di Capriles y tambe specifica kico e ta wordo acusa di dje pa e parti financiero. Abogado pa Roque Aparicio, Gregory Maldonado a pidi pa scucha Croes y Capriles como testigo pa su cliente, un funcionario di CMB pa haya sa e proceso di transaccion financiero, y doño di un restaurant pa establece un patronchi di famia. Huez a bay di acuerdo pa tende e testigonan, pero a rechaza e parti di e dagvaarding, y a sigura cu e plachi financiero ta hopi cla. No ta mira necesidad pa scucha ningun hende di CMB pero si e doño di un restaurant. Finalmente huez a bay di acuerdo cu e di dos regiezitting pa Croes, Paesch y Capriles.
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
ORANJESTAD – Radioemisoranan na Aruba mester paga pa por toca musica di artistanan. Esey ta un hecho!. Loke mester wordo determina ainda, ta e tarifa cu e fundacion DUCAPRO por cobra. Asina e huez cu a trata e caso sumario diabierna mainta den corte cu DUCAPRO a cuminsa contra di Q-Waves NV, conoci comercialmente como HITs 100FM, di e propietario Aldrich Croes. DUCAPRO a cuminsa e caso pasobra e radio lo no kier paga e suma mensual cu ta rekeri pa e paga pa haya derecho pa toca musica tur luna. E propietario di e radio a sigura cu no ta cu nan no kier paga, sino cu nan tin problema cu e suma/tarifa.
ORANJESTAD – Ex minister Guilfred Besaril su detencion awe merdia a keda prolonga cu 2 biaha 8 dia. Esaki kier men cu despues cu e la sinta su prome 8 dianan, huez comisario a haya ta necesario pa prolonga esaki un biaha mas, debi cu mas probable, no ta cla cu sea e interogacion of cu e investigacion, cu ta rekeri su detencion. Esaki pa evita cu e lo por influencia e loke ta investiga aworaki. E la keda deteni dia 13 di februari ultimo, relaciona cu e caso Tulipan unda cu ta acuse di corupcion y abuso di poder como minister tempo cu e tabata minister plenipotenciario na Hulanda. Despues dia 16 di februari a prolonga e detencion cu 8 dia mas. Awe, manera noticiacla a raporta anteriormente, e HC mester a dicidi si ta prolonga esaki. Y esey a sosode tambe.
ORANJESTAD - Ex minister Guilfred Besaril ta ketobay deteni, y awe ta finalisa e 8 dia detencion conforme e proceso di detencion. E prome dos dianan siman pasa tabata den asina yama ‘in verzekering’, y despues a prolonga e detencion cu 8 dia mas. E 8 dianan aki ta vence awe, y e huez comisario tin cu dicidi si ta prolonga e detencion aki cu 8 dia mas of ta manda e persona cas, te ora cu su caso (Tulipan) keda presenta. Por ta cu ta dicidi cu mester mas tempo pa cual por prolonga e detencion cu 8 dia mas. Y si aun mester mas tempo, por prolongue cu 8 dia mas. Despues si mester prolonga atrobe, esaki ta bira 60 dia mas. Si awe ora cu e keda presenta dilanti e huez comisario, dicidi cu ta prolonga e detencion, esaki no kier men necesariamente si cu e tin cu keda (manera tabata e caso e siman aki) e 8 dianan completo deteni. E ex minister ta wordo acusa di entre otro corupcion y abuso di su poder tempo cu e tabata minister plenipotenciario na Hulanda durante e ultimo dos periodonan di Gabinete Wever Croes I y parti di II.
ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “