Ex minister Paul Croes dilanti mesa berde diaranson pa caso Ibis

ORANJESTAD – Diaranson mainta 9’or ex minister Paul Croes tin cu presenta dilanti mesa berde pa responsabiliza su mes pa e 6 cargonan cu e ta wordo acusa di dje den e caso Ibis. E caso di diaranson ta un ‘regiezitting’ unda cu mas bien ta check di tur partido si mester di mas informacion, investigacion y stipula un fecha pa e caso mes tuma lugar. Hunto cu Croes, tin 8 persona mas cu lo mester presenta pa responsabiliza nan mes. E cargonan pa e otro 8 persona ta varia. Corte a reserva 2 dia mas pa trata e demas sospechosonan (entre 25 pa 30) cu ta envolvi den e caso aki. Pa loke ta Croes, no ta conoci si e mes lo presenta of si ta su abogadonan so lo papia na nomber di nan cliente. 

CARGO PAUL CROES

E seis cargonan contra Croes ta entre otro, “ambtsmisbruik conhuntamente cu otro of otronan den e periodo di 20 di april 2015 te 30 di januari 2017, malversacion conhuntamente cu otro of otronan di placa di e fundacion S.L.&E. den e periodo di 18 di december 2014 pa 28 di maart 2017, labamento di placa (gewoonte witwassen) conhuntamente cu otro of otronan den e periodo di prome di januari 2014 pa 28 di maart 2017, empleo di un persona indocumenta conhuntamente cu otro of otronan den e periodo di 20 di december 2016 te 28 di maart 2017. Pone un persona den ocasion pa e viola LTU den e periodo aki. Mas subsidiario, laga un persona indocumenta traha, participacion na un organizacion criminal den e periodo di prome di januari 2014 te 28 di maart 2017.