Conseho di minister aproba e ley di financiamento pa por sigui opera

ORANJESTAD – E ley di financiamento (financieringswet) cu gobernador di Aruba a sugeri pa gobierno uza pa por keda operacional, a keda aproba diamars atardi den Conseho di Minister, y a wordo entrega despues na gabinete di Gobernador. E intencion ta cu gobernador unabes gobernador keda cla cune, e wordo mando pa e organonan consultativo pa conseho, pa despues e wordo trata den parlamento.

Esaki ta nifica mes momento tambe cu parlamento lo tin cu bolbe di recess pa por trata e ley aki pa e keda cla na tempo pa gobierno por fia placa pa por cumpli cu su obligacionnan. Ta trata aki di interesnan riba debe internacional cu e mester cumpli cune. Di otro forma, nos tin e chens cu e rating cu nos tin por wordo afecta seriamente. NoticiaCla no por a confirma kico e suma exacto ta cu mester fia aworaki, pero den gangnan por a tende sumanan di 150 pa 250 miyon florin cu ta necesario pa gobierno por sigui opera.

E loke cu gobierno a haci ayera, ta actua riba e conseho di gobernador cu for di ultimo siman di juni caba a manda e mensahe pa gobernantenan riba posibilidad pa sali for di e crisis financiero no ta uno nobo. Tabata dialuna anochi cu e impresion a wordo crea den medionan local, cu ta awo gobernador lo a core manda un carta pa ‘drecha’ e relacion cu ‘lo ta daña’ entre e instituto y gobierno di Aruba. E mensahe de facto a wordo manda berdad, pero te hasta prome cu e crisis a cuminsa. Prome te hasta cu minister Juan David Yrausquin a entrega su retiro. A haci mencion inicialmente cu lo tabata trata di bono, cu mester genera e fondonan necesario (obligatielening).

Manera cu a menciona tambe, unabes parlamento aproba e ley aki , firma e ley aki conforme e contenido y e conseho cu e haya di parti di e organonan consultativo. Esey lo facilita gobierno cu su responsabilidadnan financiero, sin cu e ta haya su mes den problema, aunke cu presupuesto no ta aproba ainda. Otro forma, gobierno no por fia placa, cu tur su consecuencianan cu esaki por tin.