IVA: Kwaliteitsjaarverslag y klachtenregeling mester ta cla 1 di juni

ORANJESTAD - Dia 1 di juni 2018 ta e ultimo dia pa tur dunadonan di cuido na Aruba entrega nan kwaliteitsjaarverslag y regla nan klachtenregeling. Pues, nan mester entrega un documento cu ta duna Inspectie Volksgezondheid Aruba informacion di por ehempel, e maneho, kehonan cu a wordo entrega, incidentenan, protocol y proceduranan di un praktijk y/of institucion di cuido. Esaki ta pa IVA haya un bista di e calidad cu ta wordo brinda cerca un dunado di cuido y pa por duna conseho pa mehoracion. Alaves, tur dunadonan di cuido mester tin un klachtenregeling regla pa dia 1 di juni 2018. Esaki ta nifica cu nan mester tin proceduranan riba papel ora cu un pashent kier entrega un keho cerca e dunado di cuido. Tur e kehonan aki lo mester wordo nota tambe den e kwaliteitsjaarverslag cu ta wordo entrega na IVA anualmente.

Riba 14 di september 2017, tur dunadonan di cuido a haya un carta di IVA unda cu a anuncia cu e ultimo dia pa entrega e kwaliteitsjaarverslag y tin un klachtenregeling ta 1 di juni 2018. E fecha aki ta stipula den e Ley di Calidad di Cuido. Tambe IVA a organisa diferente anochi di informacion unda cu e sinta hunto cu e diferente dunadonan di cuido pa splica kico ta wordo spera di nan. IVA a tene cuenta tambe cu ta e prome biaha cu mester entrega un kwaliteitsjaarverslag aki na Aruba. Pa es motibo a traha un documento standard cu e diferente componentenan cu mester tin den e verslag y a manda esaki pa tur dunadonan di cuido. Na e manera aki, nan lo por yena e informacion necesario mas facil. Pa informacion detaya di e kwaliteitsjaarverslag por bay riba e website di IVA riba www.iva.aw y download esaki.

IVA kier a urgi tur dunadonan di cuido pa si tin cualkier pregunta pa tuma contacto cu nos libremente na 5262160 of via email na info@iva.aw. Tambe pa entrega e kwaliteitsjaarverslag y regla nan klachtenregeling no mas tarda cu dia 1 di juni proximo. Si no cumpli cu e deadline stipula, lo cuminsa na tuma e medidanan necesario.