Merca a impone sancion nobo contra Venezuela

WASHINGTON – Manera anticipa, presidente Mericano a impone mas sancion contra Venezuela, y a haci esaki un dia despues di e eleccion presidencial Venezolano. E medida impone ta inclui entre otro cu Merca a prohibi Venezuela pa bende su debenan cu Mericanonan pa asina haya poco placa. Esaki ta encera debenan di PDVSA. E ta inclui cualkier transaccion riba cualkier debe na e gobierno Venezolano, of cualkier transferencia di propiedad den cual Venezuela tin 50% of mas di accion aden. E ta bay asina leu cu ta stroba Venezuela di financia su mes usando hasta e subsidiario principal Mericano, Citgo Petroleum Corporation.Pues CITGO p.e. no por bende bonds den mercado, y PDFVSA no por haya ningun prestamo na ningun banco occidental. E medida tabata pa choca e fondonan cu e regimen di Maduro a purba genera door di bende debe cu e gobierno tin, pa por haya placa cash.