Ruiz: Forma con DUCAPRO a actua cu radionan no ta elegante

ORANJESTAD – Gobierno no ta haya e forma con e compania DUCAPRO via e bufete di abogado DK Legal a atende cu e emisoranan recientemente pa pidi nan pa cumpli cu nan pa loke ta royalties entrante 1 di juni. Minister di Finanza Ruiz a bisa dialuna cu mientras cu e ta trata di un asunto priva, no ta descarta cu lo pidi pa wanta cu e introduccion di e cobranza di royalties 1 juni, te ora cu tin mas claridad. A sigura si mes momento cu e ta un intento priva y ta keda na cada ken kico ta wordo haci.

DERECHO

Tur autor tin derecho na Bureau Intelectuele Eigendom (BIE), y eynan tin e ley di autor cu ta pone e sancionan ora cu un autor haya cu a viola su derecho. E caminda ta habri e ora pa e autor bay corte. Despues berdad, segun e mandatario, a bin cu e asunto di royalties. A mustra cu gobierno na 2012 a traha un cambio di ley, caminda a pone e.o. cu pa e asunto di royalities, gobierno lo apunta cua compania lo haci e compania pa e artista pa cobra esaki pa e artistanan por ricibi e placa. E la keda solamente na concepto di ley, y despues a haci cambio atrobe na 2016. E ley sinembargo nunca no a bay parlamento, segun e mandatario. Esey kier men cu mientrastanto, si e artista haya cu e no tin derecho e por bay corte y e ley ta bisa kico e sancion tin, basa riba e ley existente. E no ta kita afo cu riba tereno priva a bin e abogado cu e compania canades cu ta haci esaki riba tereno priva.

MANEHO

For di gobierno e maneho presenta, no ta di gobierno pero uno priva. Gobierno tin pregunta riba e tema aki segun e mandatario , y den esaki lo yama e abogado cu ta representa e compania, esta David Kock pa papia riba dje, y su intencionan pa wak a base di kico e ta basa su mes. Un di e pregunta di e mandatario, ta basa riba e cobranza di un suma di 3000 florin. E mandatario kier tin un bista di con ta yega na e suma y ken nan ta representa. Gobierno lo busca un opinion legal riba e asunto aki, cu ta pasando riba tereno priva. E ta keda na cada un di e doñonan di radio pa busca nan asesoria legal den e aspecto aki. Personalmente no a elegante pa manda un carta pa pidi pa prome di 1 di juni e radionan tuma, sino por bay huez y pidi daño y perhuicio. E tono no ta bon pa e caminda cu kier yega den e sentido priva. Gobierno ta reglando algo den ley cu ta regarda e asunto di autor. Lo indica cua instancia lo por hacie. E asunto lo por a bay mas elegante segun e mandatario .