Emisoranan mester paga 3 mil florin mensual pa toca cancion

Emisoranan mester paga 3 mil florin mensual pa toca cancion

Posted on 05/20/2018 9:49 pm AST | Updated on 05/20/2018 9:50 pm AST

ORANJESTAD – Entrante 1 di juni 2018, radio emisoranan na Aruba (tin entre pa 21 emisora) mester paga un multa pa cada cancion cu nan toca comercialmente, si nan no ta afilia na e agencia cu ta representa nan derecho, esta (Dutch Caribbean Pro) DUCAPRO via e bufete di abogado DK Legal. Pa nan ta afilia y asina tin derecho riba uso comercial di un lista grandi di artista local y internacional afilia, nan mester paga DUCAPRO e suma mensual di 3.000 florin. Asina e bufete di abogado David Kock (DK LegaL) a informa tur radio emisora pa medio di un carta siman pasa. Esnan cu no kier afilia (cu ta nan bon derecho segun e agencia) lo wordo cobra y/of multa pa cada bez cu nan toca un cancion cu ta registra pa DUCAPRO.

ROYALTIES

E asunto a bin na luz algun luna pasa ora cu e bufete cu ta representa e hala Caribense di SOCAN (Agencia Canades internacional di registro di cancion), esta DUCAPRO, a presenta e concepto publicamente. Ta trata di e concepto di paga ‘royalties’ esta un suma di placa pa cada bes un cancion di un artista wordo toca. E placa cobra ta bay pa e artista, pa asina e por beneficia tambe di e parti comercial di p.e. un emisora. Ta sali for di punto di bista cu aworaki ta e instancia comercial so ta beneficia financieramente di un toca di cantica, mientras cu e doño di e cantica mes no ta keda beneficia. E ta un concepto normal internacional cu semper a funciona.

ARUBA NO

Sinembargo e reaccion tabata hopi mixto. Artistanan local ta dividi riba e tema, mientras cu radio emisoranan (mayoria) ta hopi rabia riba e idea. Hopi a protesta y algun a te hasta informa publicamente cu no ta descarta cu awor nan lo cuminsa cambia formato di uno musical pa uno di papia so, esta un estilo ‘talk radio’. No ta conoci ki efecto real e emisoranan lo tin riba e asunto aki y kico lo basa unabez e fecha ey vence.

 

  • Zulo
  • Powered by SETAR