Segun gobierno, reaccion CFT riba ‘transaccion tax’ no ta negativo

ORANJESTAD – Gobierno ta interpreta e comentario di e secretariado di College Financieel Toezicht riba e asunto di introduccion di un financial transaction levy, como algo no negativo. Den e rapport final di CFT riba e presupuesto 2014 di pais Aruba, nan ta mustra cu nan ta preocupa cu e intencion di gobierno di Aruba pa implementa esaki, ya cu e por tin consecuencia serio pa Aruba. Minister di finanzas Angel Bermudez sinembargo, riba pregunta di NoticiaCla.com ta interpreta esaki di un diferente forma. “Nan ta bisa cu e no ta mal idea, dus cu opzich e ta bon idea, pero tene cuenta si cu tur e riesgonan cu tin”, Bermudez a sigura NoticiaCla.com. E mandatario ta sigura cu gobierno ta na altura di e riesgonan cu e introduccion aki por tin. “Basicamente nan ta confirma cu nos tin cu haci un estudio profundo, prome cu nos tuma un decision riba djele. Dus nan no a ‘descarte”.Bermudez a debati riba e tema, indicando cu segun su interpretacion, ‘loke cu CFT ta diferencia di opinion cune, ta cu CFT ta propone cu kizas si bo no hinca e proyectonan den un fondo, bo haci e financial transaccion levy toch, kizas e ora bo por uza e entrada ey pa reduci bo debe nacional’.

Tabata algun dia pasa ora cu NoticiaCla.com a pone man riba e rapport di CFT, cu e organo aki ta reacciona negativo riba e punto aki. Y aki a mustra cu e secretariado di College Financieel Toezicht ta desconseha gobierno pa implementa un ‘transaction tax’. Segun e rapport, -cu NoticiaCla.com a tira un bista ariba-, CFT ta mustra cu e intencion di gobierno di Aruba ta pa introduci e tax aki pa por cubri e proyectonan PPP (Private & Public Partnership). Pero e peliger, -segun CFT-, ta cu lo crea un peliger riba ponemento di prioridad integral di gobierno pa cumpli cu pagonan. “Ademas no ta mucho cla, kico e consecuencianan ta di un cobransa riba e transaccionnan financiero di banco”. Como tal CFT ta conseha gobierno pa investiga bon, kico e consecuencianan negativo ta, ‘prome cu tuma tal paso’.