Reaccion di minister riba sentencia a laga sector hudicial preocupa

ORANJESTAD – Relaciona cu e sentencia di e siman aki di Fundacion Lotto pa Deporte contra minister di Deporte Dangui Oduber, varios persona den sector hudicial a reacciona cu asombro pa NoticiaCla riba e forma con un mandatario ta reacciona abiertamente contra un huez y e poder hudicial na Aruba. A haci esaki cu condicion cu no ta publica nan nomber y titulo. Fuera di e grupo aki, tin politiconan opositor  cu tambe a haci nan remarke, pero den e caso aki, a haci esey cu intencionan politico mas bien. 

MENSAHE

Bek pa e sentencia, los si sentencia ta na su lugar of no, e criticanan ta mustra cu esaki no ta manda e mensahe corecto pa comunidad. “Un persona cu no ta di acuerdo cu un sentencia, tin derecho di bringa esaki door di apela. Pero no habri afo publicamente den prensa contra e poder hudicial” e comentarionan tabata.

IMPLICACION

Mas comentario den seno hudicial ta mustra cu mester mustra respect pa e segregacion di poder y cu esaki ta mina nos democracia ora cu e poder ehecutivo cuminsa ataca e poder hudicial. “Esaki no ta wega, nos mester ta preocupa ora cu un minister haci declaracionnan peligroso asina”, algun di e otro comentarionan a confia na e portal aki. Mes momento, mester bisa cu no ta prome biaha si cu un persona den funcion di minister (pasado of y presente) a haci declaracionan contra huez. Den pasado tambe esaki a keda critica. 

E CASO

E comentarionan ta referi na e declaracionnan haci na e portal aki e siman aki di e mandatario concerni, despues di a tuma nota di un sentencia cu no tabata na su fabor. E sentencia cu un huez a dicta na fabor di fundacion lotto pa deporte, imponiendo un multa si e mandatario vocifera y stroba trabou di e fundacion, a pone e mandatario reacciona riba esaki. Pero el a haci esaki na mas media y cierto momento a yama e huez pa un persona ‘politiek verziekt’. Mesora e portal aki a keda acerca pa personanan den e sector hudicial pa comparti nan pensamento.