Gobierno investigando fuente di noticia falso riba asilo politico

ORANJESTAD – Gobierno di Aruba a inicia un investigacion pa e posibel fuente di noticia falso riba asilo politico di un dia prome. Asina minister responsabel pa telecomunicacion Chris Romero a informa den un comunicado diabierna. Segun e comunicado, “a tuma e pasonan necesario pa cuminsa cu un investigacion pa saca afor di unda e informacion incorecto aki lo a sali”.

RADIO RESPONSBEL

Segun e mandatario, informacion acumula na prome instante ta apunta cu un locutor di un radio local cu formato na idioma spaño, ta e persona cu lo a propaga e noticia falso di un supuesto asilo politico of amnistia cu DIMAS lo ta dunando pa personanan procedente di Venezuela.

DTZ

Pa sali di tur duda y no bay tras di rumor, Romero a sigui bisa cu a instrui departamento di DTZ pa pidi grabacion di e programacion di e radio en cuestion. Si e persona aki a duna dicho informacion incorecto durante su programacion radial, lo bay tuma e pasonan pertinente y den cuadro legal pa cu su accion.

PARA FAKE NEWS

Finalmente, e comunicado ta bisa cu ‘teniendo transparencia semper como motor principal di Gabinete Wever-Croes, Minister di Telecomunicacion lo haci tur loke ta posibel pa cuminsa pone un stop na e fenomeno di “fake news, cual a keda demostra di tin e poder unico di destrui y haci daño na cualkier comunidad, pais of nacion’.

REACCION RADIO

Mientrastanto ya for di e mesun anochi, e director di e radio cu ta wordo cuestiona, Win Donata a emiti un mensahe riba Facebook, sigurando cu no ta di nan e la sali y cu nan tin tur grabacion y a verifica si e por a sali for di e radio, pa medio di un locutor cu ta cumpra ora. Pero segun e director, esaki no tabata e caso y a entrega tur grabacion necesario caba pa proba esaki.