Bermudez: Pakico gobierno no ta implementa tur recomendacion di CFT

ORANJESTAD – Gobierno di Aruba no ta bay incorpora tur e recomendacionnan cu secretariado di CFT a propone den e rapport final di e presupuesto 2014. Esey no ta kita afo cu pa gran parti, gobierno por a haya su mes den e recomendacionnan presenta recientemente door di CFT. Minister di finanzas di Aruba Angel Bermudez a splica cu e motibo ta cu Hulanda no ta tene cuenta cu e circumstancianan di e realidad di Aruba. Asina Bermudez ta argumenta e diferencia di opinion entre Aruba y Hulanda relaciona cu e rapport final di secretariado di CFT. Esey ta splica e motibo segun Bermudez, cu Hulanda kier impone cierto medida pa gobierno di Aruba, mientras cu esaki simplemente no ta posibel. Bermudez diahuebs a motiva e reaccion di gobierno segun esaki a keda presenta den e presupuesto supletorio entrega diaranson ultimo.

“Bo por tin diferente perspectiva” Bermudez a splica NoticiaCla.com. Tin e perspectiva di gobierno di Aruba, tin esun di Fondo Monetario Internacional (IMF), y tin esun di College Financieel Toezicht (CFT). Aki Bermudez ta mustra riba e recomendacion cu IMF a duna, cu ta pa Aruba logra su presupuesto balansa ya na aña 2015. Algo cu a ser mustra cu simplemente no ta realistico segun Bermudez. “E ta exigi medidanan asina drastico cu bo ta bay basicamente kibra bo economia cu a pasa den pasado na otro paisnan” e mandatario a sigui bisa. Como tal gobierno a opta contra di dje. Mescos, CFT tambe a bin cu varios recomendacion cu ta pone cu nan no por cumpli cune. Pues Bermudez a indica cu ora tuma e recomendacionnan over, cu ki tempo y ki prioridad y secuencia bo ta hacie, pasobra e tin efecto riba e situacion na Aruba.

Segun Bermudez, mayoria di e informacion y situacion presenta den e rapport final tabata conoci. “Unico cos ta cu mester pone prioridad ki ora ta introduci y eherce nan”. “Pesey un parti nos a añadi (den e presupuesto supletorio 2014) y e resto lo wordo poni den esun den 2015”. Como tal Bermudez a pidi gobernador pa e haya e presupuesto 2015 bek pa asina e por sincronisa e loke e la haci cu esun di 2014. “Na e manera ey bo ta purba toch haci uso di tur e bon recomendacionnan cu nan ta haci cu e ta fit den nos realidad” Bermudez a sigui bisa.