Wever den NRC: Postura Hulanda vs migracion Venezolano ta indiferente y irritante

DEN HAAG/ORANJESTAD – Prome minister di Aruba Evelyn Wever Croes ta haya e postura di Hulanda relaciona cu e migracion Venezolano pa islanan ABC ‘indiferente y irritante’. Asina e corant Hulandes NRC Handelsblad ta cita un combersacion cu e prome mandatario di Aruba den su edicion di diabierna. Segun Wever a declara na e corant, Aruba no mester conta cu ayudo di Hulanda pa cu refugio di e Venezolanonan. “Hulanda no kier yuda nos cu esaki. Tur cos tin un prijs. Solamente di e ministerio di defensa nos ta haya ayudo logistico” Wever a sigui bisa. Segun e corant, e prome mandatario ta tene cuenta cu un influx massal di Venezolano (pa Aruba) despues di e eleccion.

REFUGIO

E corant ta papia di un plan pa un campo di tent unda cu por yuda 500 refugiado. E corant ta papia di 5000 illegal cu a bin Aruba desde e crisis. Segun e premier, Aruba ta conociendo un aumento di e fenomeno di xenofobia (e miedo y desconfianza pa un stranhero), siendo cu e isla ta conoci pa su grado halto di tolerancia. “Hende ta spera di nos gobierno cu nos lo asumi un maneho tipo (Donald) Trump y tambe bay traha un muraya (pa proteha nos isla)” Wever a declara na e corant. E ta cuestiona e dos cara cu Hulanda ta usando. Di un banda Hulanda ta sostene e maneho di Union Europeo contra Venezuela, y di otro banda ta para banda di Venezuela pa loke ta e asunto di blokeo cu e islanan ABC. “Mi a wordo invita pa e bishita ey pero mi no ta participa na show” Wever a bisa e corant, segun e articulo mes ta cita. Lesa e articulo completo AKI.