Lugo: 1132 Venezolano por vota na Aruba pa eleccion presidencial

ORANJESTAD – Diadomingo awor un total di 1132 Venezolano na Aruba tambe por vota pa e eleccion presidencial di e pais andino. Asina e Consul Interino Amabél Lugo a confirma pa NoticiaCla diahuebs. E eleccion presidencial pa e termino 2019-2025 ta tuma lugar dia 20, y esnan cu ta inscribi den e registro Electoral permanente, por vota tambe e ora. Lugo a sigura e portal aki cu e preparativonan pa e proceso electoral ta canando bon.

CRONOGRAMA

E proceso electoral segun e consul encarga, ta wordo realiza cu tur normalidad di acuerdo cu e cronograma diseña pa e Conseho Nacional Electoral (CNE), Lugo a sigui bisa. Esaki ta aproba pa e partidonan y organizacionnan politico cu ta participa y ta den cumplimento di e normativa electoral vigente.  

CON VOTAMENTO TA TUMA LUGAR

Esnan cu kier vota, mester ta inscribi den e Registro Electoral Permanente (REP), y por acudi na e cede consular diadomingo entre 8’or di mainta y 6’or di atardi. Nan mester tin un cedula di identidad Venezolano lamina, aun si esaki ta venci. E votador ta wordo verifica pa e carchi di votacion previamente envia pa CNE, e miembronan di e mesa, cu e observacion di testigo previamente acredita di cada un di e candidatonan. Nan mester vota, y tambe cologa nan fingerprint, Nan lo haya un carchi di votacion, cu ta keda otorga nan nan unda cu nan ta marca un X pa e candidato preferencial. Por ultimo, nan ta deposita e carchi di voto den e un caha seya, y asina e proceso ta finaliza. Pues manera cu nos tambe conoce na Aruba

VOTONAN DI ARUBA

Unabez cu e votamento ta cla, ta conta e votonan, nan ta wordo controla pa miembro di mesa, funcionario di consulado, y testigonan acredita. Ta yena esaki den un acta cual ta wordo firma pa esnan presente hunto cu e buki di votacion cu tin tur e firma y fingerprint di e votadornan y manda pa Venezuela.

VOTA DELANTA

A puntra Lugo si por vota delanta manera cu cierto paisnan ta permiti. Pero aki esey no ta posibel, y por vota solamente riba e fecha y ora stipula pa CNE. Esaki pa e simple motibo segun Lugo, pasobra ” Venezuela ta conta cu un sistema electoral moderno, confiable, sigur y totalmente automatiza, cu 100% auditoria prome, durante y despues di eleccion”. Lugo a bisa. Pero na Aruba si e proceso ta manual.