Paskel: Ningun rato DIMAS a informa cu lo duna asilo politico awe

ORANJESTAD – No tin ningun proceso di amnestia na vigor actualmente. Asina directora di DIMAS Kathy Ruiz Paskel a confirma diahuebs merdia na NoticiaCla. Esaki ta basa riba e fluho di centenares di persona Latino cu a acudi diahuebs mainta tempran na DIMAS keriendo cu nan lo a bin haya amnestia y of asilo politico. Un rumor fuerte cu a circula un dia anterior incorecto tabata informa cu esaki lo tabata e caso.

TRATADO

Aruba ta mara na tratadonan international pa loke ta e asunto di asilo politico, cu ta specifica ki ora un persona por haya e asilo, kico e proceso ta y con tin cu trata e persona(nan). Segun Ruiz di un forma of otro, e informacion a pasa rond cu DIMAS lo bay ‘otorga’ esaki diahuebs. Esey sigur no tabata e caso segun e directora. Pa e tempo cu e ta directora, por bisa cu ningun persona a haya e otorgamento aki. Pa aña tin un of mas peticion, pero nunca mas cu 10. Pero e aña aki esaki a surpasa si. “Pero no tin ningun caso concedi di asilo politico”.

ESNAN NA DIMAS

E intencion di DIMAS tabata pa informa den oranan di merdia atrobe na esnan cu a acudi, kico e tratado ta ensera y cu ta un mal comprendemento y despues pa esnan cu a bin cu e intencion di haya e asilo, bandona e sitio. Mester a kita duda di e espectativanan falso cu tabatin. “ E situacion lo normalisa den e dianan cu lo bin”.

DIFERENCIA ASILO VS AMNESTIA

Ruiz a mustra atrobe cu tin un diferencia entre e dos terminologianan Asilo Politico y Amnestia. Asilo politico un persona por pidi ora cu e yega e pais, na frontera y ta haci e peticion oficial na e autoridad di e pais, den e caso aki Aruba cu e motibo cu su bida ta core peliger na su pais di origen pa motibonan politico. Unabez cu e persona pidi e asilo, e ta haya status di ‘asielzoeker’, y no por wordo saca di e pais, pendiente e proceso di su peticion pa asilo politico. Pa loke ta e parti di Amnestia, esaki ta ora cu duna oportunidad na esnan cu no tabatin permiso, pa un periodo di gracia pa nan por regla nan asuntonan, sino cu ta actua contra nan.